قىرعىزستان پارلامەنتىنىڭ بۇرىنعى سپيكەرى مۋكار چولپونبايەۆ كوروناۆيرۋس ينفەكسياسىنان قايتىس بولدى. بۇل تۋرالى ريا حابارلادى.

"بۇگىن، 24 مامىردا، رەسپۋبليكالىق كلينيكالىق جۇقپالى اۋرۋلار ەمحاناسىندا قىرعىزستان پارلامەنتىنىڭ ەكس-سپيكەرى، قوعام قايراتكەرى مۋكار چولپونبايەۆ 70 جاسىندا كوروناۆيرۋس ينفەكسياسىنان قايتىس بولدى"، دەلىنگەن حابارلامادا. 

چولپونبايەۆ اۋرۋحاناعا 5 مامىردا تۇسكەن، كەيىننەن جاعدايى ناشارلاپ 12 مامىردا جانساقتاۋ بولىمىنە جاتقىزىلعان.

كوروناۆيرۋس انىقتالعاننان كەيىن ەكس-سپيكەردە ەكى جاقتى پنەمونيا مەن تىنىس الۋ جولدارىندا ءبىرقاتار اسقىنۋلار پايدا بولعان.  ونىڭ بۇدان بولەك جۇرەك، بۇيرەك جانە بۋىن اۋرۋلارى بار ەدى.

مۋكار چولپونبايەۆ ادىلەت ءمينيسترى جانە قىرعىزستان پارلامەنتىنىڭ دەپۋتاتى قىزمەتتەرىن اتقارعان.

بۇگىندە قىرعىزستاندا جالپى 1440 ادامنان COVID-19 انىقتالعان. ونىڭ 275ء-ى مەديسينالىق قىزمەتكەر. جازىلعاندار – 980، ال 15ء-ى ىندەتتەن كوز جۇمعان.