قازاقستاننىڭ باس مەملەكەتتىك سانيتار دارىگەرى ايجان ەسماعامبەتوۆا قازاقستان رەسپۋبليكاسىنىڭ حالقى اراسىندا كوروناۆيرۋس ينفەكسياسىنىڭ الدىن الۋ جونىندەگى شارالاردى ودان ءارى كۇشەيتۋ تۋرالى قاۋلى قابىلدادى.

قازاقستانعا شەتەلدەن كەلەتىن بارلىق ادام 2 تاۋلىككە دەيىن COVID-19-عا زەرتحانالىق تەكسەرۋ جۇرگىزۋ ءۇشىن كارانتيندىك ستاسيوناردا وقشاۋلانادى.

COVID-19 اۋرۋىنىڭ بەلگىسى بار ادامدار كارانتيندىك ستاسيونارعا ەمەس، پروۆيزورلىق ستاسيونارعا ەمدەۋگە جاتقىزىلادى.

شەكارادان وتكەن سوڭ 5 كۇننەن كەشىكتىرىلمەي پتر زەرتحانالىق تەكسەرۋدە تەرىس ناتيجە كورسەتكەن انىقتاماسى بار شەت ەلدەن كەلگەن ادام ۇيدە (ءۇي كارانتين) 14 تاۋلىك بويى وقشاۋلانادى.

العاشقى ەكى كۇندە COVID-19-عا زەرتحانالىق تەكسەرۋ ناتيجەلەرىن العاننان كەيىن وڭ ناتيجەلى ادامدار ەمدەلۋ ءۇشىن ينفەكسيالىق ستاسيونارعا اۋىستىرىلادى، COVID-19-عا تەرىس ناتيجەلى ادامدار 12 تاۋلىك بويى ءۇي كارانتينىندە وقشاۋلانادى. ۇيدە وقشاۋلاۋ ءۇشىن جاعداي بولماعان كەزدە جەرگىلىكتى اتقارۋشى ورگان بەلگىلەگەن ءۇي-جايلاردا وقشاۋلاۋ ۇسىنىلادى.

قازاقستانعا شەت ەلدەن كەلگەن ديپلوماتيالىق، كونسۋلدىق مەكەمە جانە حالىقارالىق ۇيىمدار وكىلدىگىنىڭ قىزمەتكەرلەرى جانە ولاردىڭ وتباسى مۇشەلەرى تەكسەرىستەن وتەدى جانە 14 تاۋلىك بويى ءۇي جاعدايىنداعى كارانتينگە الىنادى.

اۆياكومپانيالاردىڭ ەكيپاجدارى، لوكوموتيۆ بريگادالارىنىڭ مۇشەلەرى قوڭىراۋ شالۋ ارقىلى (مۇمكىندىگىنشە بەينەقوڭىراۋ شالۋ) تۇرعىلىقتى (كەلگەن) جەرى بويىنشا مەديسينالىق باقىلاۋعا جاتادى.

ۆاحتالىق ادىسپەن جۇمىس ىستەيتىن، «تەڭىزشيەۆرويل» ج ش س وبەكتىلەرىنەن دەموبيليزاسيالانعان ادامدار COVID-19-عا زەرتحانالىق تەكسەرۋ جۇرگىزۋ ءۇشىن كەلگەن ورنى بويىنشا كارانتيندىك ستاسيوناردا 2 تاۋلىككە دەيىن وقشاۋلاۋعا جاتادى، وڭ ناتيجەلى ادامدار ەمدەۋ ءۇشىن ينفەكسيالىق ستاسيونارعا اۋىستىرىلادى، COVID-19-عا تەرىس ناتيجەلى ادامدار 12 تاۋلىك بويى ۇيدە (ءۇي كارانتينى) وقشاۋلانادى. ۇيدە وقشاۋلاۋ ءۇشىن جاعداي بولماعان كەزدە جەرگىلىكتى اتقارۋشى ورگاندار ايقىنداعان ءۇي-جايلاردا وقشاۋلاۋ ۇسىنىلادى.

قاۋلىنىڭ تولىق ماتىنىمەن كوميتەتتىڭ سايتىندا تانىسۋعا بولادى.