قازاقستان رەسپۋبليكاسى پرەزيدەنتىمەن 2020 جىلعى 4 مامىردا قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا (بۇدان ءارى - زاڭ) قول قويىلدى. زاڭنىڭ 2-بابىنا سايكەس، العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ، ياعني 2020 جىلعى 16 مامىردان باستاپ قولدانىسقا ەنگىزىلدى. بۇل تۋرالى شىعىس قازاقستان وڭىرلىك كوممۋنيكاسيالار قىزمەتىندە وتكەن بريفينگ بارىسىندا شقو مەملەكەتتىك ەڭبەك ينسپەكسياسى باسقارماسى باسشىسى باقىتبەك قيزاتوۆ ءمالىم ەتتى.

- ەڭبەك قاتىناستارىن رەتتەۋدىڭ قازاقستاندىق مودەلى قىزمەتكەرلەر مەن جۇمىس بەرۋشىلەر مۇددەلەرىنىڭ تەڭگەرىمىن، الەۋمەتتىك ديالوگتى قامتاماسىز ەتۋ نەگىزىندە دامۋدا. زاڭعا ەنگەن وزگەرىستەر ەڭبەككە اقى تولەۋ، قىزمەتكەرلەردى جالداۋ، جۇمىستان بوساتۋ جانە اۋىستىرۋ، الەۋمەتتىك ارىپتەستىك، ەڭبەك قاۋىپسىزدىگى جانە ەڭبەكتى قورعاۋ جونىندەگى ماسەلەلەردى قامتيدى، - دەدى باقىتبەك قيزاتوۆ.

ايتا كەتەيىك، زاڭعا سايكەس قازاقستان رەسپۋبليكاسىنىڭ 5 كودەكسىنە جانە 6 زاڭىنا وزگەرىستەر مەن تولىقتىرۋلار ەنگىزىلدى.

بريفينگ بارىسىندا باسقارما باسشىسى ەڭبەك كودەكسىنە (بۇدان ءارى - كودەكس) ەڭبەك شارتتارىن ەسەپكە الۋدىڭ ءبىرىڭعاي جۇيەسى تۋرالى تۇسىنىك ەنگىزىلگەنىن اتاپ ءوتتى. بۇل ەڭبەك شارتتارىن، ەڭبەك قىزمەتىن جانە قىزمەتكەرلەر سانىن ەسەپكە الۋدى اۆتوماتتاندىرۋعا ارنالعان اقپاراتتىق جۇيە.

- ەلەكتروندىق ەڭبەك شارتتارىن ەنگىزۋ، قىزمەتكەر مەن جۇمىس بەرۋشىنىڭ ەڭبەك قاتىناستارىنىڭ اشىقتىعىن قامتاماسىز ەتەدى، ەڭبەك قۇقىقتارىن ساقتاۋ مونيتورينگىنىڭ تيىمدىلىگىن ارتتىرادى، قۇجاتتاردى قولدان جاساۋ ءقاۋىپىن بولدىرمايدى جانە جۇمىسقا ورنالاستىرۋ پروسەسىن جەدەلدەتەدى. ەندى ەنگىزىلگەن وزگەرىستەرگە سايكەس، قىزمەتكەر ەڭبەك شارتتارىن ەسەپكە الۋدىڭ ءبىرىڭعاي جۇيەسىنەن ەڭبەك شارتى جانە ءوزىنىڭ ەڭبەك قىزمەتى تۋرالى مالىمەتتەردى الۋعا، ال جۇمىس بەرۋشى ەڭبەك شارتتارىن ەسەپكە الۋدىڭ ءبىرىڭعاي جۇيەسىنەن ۇمىتكەرلەردىڭ دە (ولاردىڭ الدىن الا كەلىسىمىمەن) جانە قىزمەتكەرلەردىڭ ەڭبەك قىزمەتى تۋرالى مالىمەتتەردى الۋعا قۇقىلى. سونداي-اق، كودەكسكە سايكەس، جۇمىس بەرۋشى قىزمەتكەرمەن ەڭبەك شارتىن جاساسۋ جانە توقتاتۋ، وعان ەنگىزىلگەن وزگەرىستەر جانە (نەمەسە) تولىقتىرۋلار تۋرالى، سونداي-اق كەيبىر مالىمەتتەردى ەڭبەك شارتتارىن ەسەپكە الۋدىڭ ءبىرىڭعاي جۇيەسىنە ەنگىزۋگە مىندەتتى، - دەدى باقىتبەك قيزاتوۆ.

باسقارما باسشىسىنىڭ ايتۋىنشا، ەڭبەك شارتىن جاساسۋ، وعان وزگەرىستەر مەن تولىقتىرۋلار ەنگىزۋ ەلەكتروندىق سيفرلىق قولتاڭبا ارقىلى كۋالاندىرىلعان ەلەكتروندىق قۇجات نىسانىندا جۇرگىزىلەدى. بۇل جۇمىس بەرۋشىنىڭ ەڭبەك شارتىن قاعاز جۇزىندە عانا  جاساسۋدى الىپ تاستاۋعا دا مۇمكىندىك تۋعىزادى.

- كادرلىق ءىس جۇرگىزۋدى سيفرلاندىرۋ ماقساتىندا، جۇمىس بەرۋشى قىزمەتكەردىڭ ەڭبەك شارتىندا (جۇمىستى ورىنداۋ ورنى، ەڭبەك شارتىنىڭ مەرزىمى، لاۋازىمى، جۇمىس ۋاقىتى مەن تىنىعۋ ۋاقىتىنىڭ رەجيمى جانە ت.ب.) كوزدەلگەن ەڭبەك قىزمەتى تۋرالى اقپاراتتى، ەڭبەك شارتتارىن ەسەپكە الۋدىڭ ءبىرىڭعاي جۇيەسىنە (ەشەابج) ەنگىزۋگە مىندەتتى.

قازىرگى ۋاقىتتا، مينيسترلىك ەلەكتروندىق ەڭبەك شارتتارىن ەنگىزۋ بويىنشا پيلوتتىق جوبانى جۇزەگە اسىرۋدا، ونىڭ اياسىندا ءبىزدىڭ وبلىستا 2129 ۇيىم جاسالعان ەڭبەك شارتتارى تۋرالى 99745-تەن استام مالىمەتتەر ەنگىزىلدى، - دەدى باقىتبەك قيزاتوۆ.

شقو اقپارات ورتالىعى