اۋىر اتلەتيكادان ازيا چەمپيونى جانە قولا جۇلدەگەرى، ازيا ويىندارىنىڭ جەڭىمپازى جانە قولا جۇلدەگەرى باحىت احمەتوۆ اۋىر اتلەتيكادان قازاقستان قۇراماسىنىڭ باس باپكەرى قىزمەتىنە تاعايىندالدى، دەپ حابارلايدى قازاقستان اۋىر اتلەتيكا فەدەراسياسىنىڭ باسپا ءسوز قىزمەتى.
وسىعان دەيىن بۇل قىزمەتتى 2016 جىلدان بەرى يۋريي مەلنيكوۆ اتقارعان ەدى. باحىت احمەتوۆ وسىعان دەيىن اۋىر اتلەتيكادان وليمپيادالىق دايارلاۋ ورتالىعىندا اعا جاتتىقتىرۋشى قىزمەتىن اتقارعان.
"2009 جىلدان بەرى جاستار كومانداسىن باپتاعان باحىت احمەتوۆتىڭ شاكىرتتەرى وليمپيادا مەن الەم چەمپيوناتى، قۇرلىقتىق بىرىنشىلىك پەن حالىقارالىق دودالاردا ەل نامىسىن ابىرويمەن قورعاپ ءجۇر. 41 جاستاعى مامان جازيرا جاپپارقۇل، الەكساندر زايچيكوۆ، كارينا گوريچيەۆا، البەرت ليندەر جانە يگور سون سىندى سپورتشىلاردى ۇلتتىق قۇراما ساپىنا قوسقان" دەلىنگەن اقپاراتتىق حابارلامادا.
پىكىر قالدىرۋ