بۇگىن قامشى پورتالىنىڭ رەداكسياسى ساياسي قۋعىن-سۇرگىن جانە اشارشىلىق قۇرباندارىنىڭ ارۋاعىنا تاعزىم ەتتى. الماتىداعى قاراساي باتىر جانە ناۋرىزباي باتىر كوشەلەرى قيىلىسىنداعى ساياباقتا ورناتىلعان ەسكەرتكىشكە گۇل شوقتارى قويىلىپ، قۇران وقىلدى.

اتاۋلى كۇنگە ارنالىپ ساياباق ىشىندەگى الاڭقايعا 20 الاش قايراتكەرىنىڭ سۋرەتىنەن فوتوگالەرەيا ۇيىمداستىرىلدى.

شارا بارىسىندا ق ر مادەنيەت قايراتكەرى، اقىن الماس احمەتبەك ءسوز الىپ، قازاق حالقىنىڭ تاريحىنداعى ناۋبەت كەزەڭ تۇتاس ۇلتتىڭ جارتىسىن جويىپ جىبەرگەنىن ايتتى.

– كەڭەس ۇكىمەتىنىڭ قولدان ۇيىمداستىرعان اشارشىلىعى مەن قىزىل اسكەردىڭ قازاق قايماقتارىن قاساقانا قىرۋىنىڭ كەسىرىنەن حالقىمىزدىڭ جارتىسى وپات بولدى. ءتىپتى بىزگە ۇلت رەتىندە جويىلىپ كەتۋ ءقاۋپى تونگەن بولاتىن. الايدا حالقىمىزدىڭ قايسارلىعىنىڭ ارقاسىندا ۇلت بولىپ ساقتالىپ قالۋ باعى بۇيىرىپ، تاۋەلسىزدىككە قول جەتكىزىپ، بۇگىن مىنە، وسىندا تۇرعان جايىمىز بار. اشارشىلىق پەن قۋعىن-سۇرگىن قۇرباندارى تۋرالى ايتۋ وتە اۋىر. بۇل قازاق تاريحىنداعى ەڭ زۇلماتتى كەزەڭدەردىڭ ءبىرى. بىزگە قالعانى الاش ارىستارى ارمانداعان تاۋەلسىزدىكتى باياندى، مەملەكەتتىمىزدى قۋاتتى ەتۋ. الاشورداشىلاردىڭ ەلگە قىلعان قىزمەتى ءبىز ءۇشىن قۇبىلا بولۋعا ءتيىس. ولار ەلىن، جەرىن شەكسىز ءسۇيدى. ۇلت ءۇشىن تۋىپ، ۇلت ءۇشىن ءومىر ءسۇردى. سوڭعى دەمى شىققانشا ۇلت دەپ ءوتتى. بۇنى جادىمىزدان ەشقاشان شىعارماۋىمىز كەرەك. وسى ماقساتتا بۇگىن وسىندا باس قوسىپ وتىرمىز. جۋرناليست، ساياسي تۇلعا رەتىندە قالىپتاسىپ كەلە جاتقان ازامات ءبىلال قۋانىش باس بولىپ قامشى پورتالىنىڭ ۇل-قىزدارى الاش ارداقتىلارىنىڭ سۋرەتتەرىنەن اشىق اسپان استىنداعى فوتوگالەرەيا ۇيىمداستىرىپتى. يگى شارادان مەن دە قالىس قالمايىن دەپ، بولاشاعىمىز گۇلدى بولسىن دەپ ىرىمداپ قۇرباندار ەسكەرتكىشىنە ءبىر تال گۇلىمىزدى قويۋعا كەلدىك، – دەدى اقىن.

گۇل شوقتارىن قويۋعا قالا تۇرعىندارىمەن قاتار جەلتوقسانشىلار، جۋرناليستەر، مادەنيەت جانە ونەر ادامدارى باردى.