ۇلىبريتانيانىڭ استاناسى لوندوندا مىڭداعان ادام امەريكا قۇراما شتاتتارىنداعى دجوردج فلويد ەسىمدى قارا ءناسىلدى جىگىتتىڭ پوليسيا قولىنان قازا تابۋىنا نارازىلىق ءبىلدىرىپ، شەرۋگە شىقتى. بۇل تۋرالى قامشى ءتىلشىسى BBC-گە سىلتەمە جاساپ حابارلايدى.
ولار "دجوردج فلويدقا ادىلەتتىلىك" دەگەن جازۋلار جازىلعان پلاكاتتاردى كوتەرىپ، "ناسىلشىلدىككە ورىن جوق" دەپ ۇرانداتىپ، كوشەلەردى جاپتى.
نارازىلىق ۇلىبريتانيانىڭ بىرنەشە قالاسىن شارپىدى. جۇزدەگەن ادام مانچەستەر قالاسى مەن كارديفف قالاسىنىڭ ورتالىعىنان ءجۇرىپ وتكەن.
– لوندوندا نارازىلىق بىلدىرۋشىلەر "مەن تىنىس الا المادىم" دەگەن جازۋى بار پلاكاتتار ۇستادى، – دەپ حابارلادى BBC. بۇل ءسوزدى پوليسيا تىزەسىنىڭ استىندا قازا تاپقان قارا ءناسىلدى جىگىت ولەر الدىندا ايتقان-دى.
ۇلىبريتانيا پوليسياسى اقش ەلشىلىگىنىڭ ماڭىندا 17-25 جاس ارالىعىنداعى بەس ادامدى قاماۋعا العان. ولاردىڭ ۇشەۋى كوۆيد-19 زاڭىن بۇزعانى ءۇشىن، ەكەۋى پوليسياعا شابۋىل جاساعانى ءۇشىن تۇتقىندالعان.
ۇستالعاندار پوليسياعا جاۋاپ الۋ ءۇشىن قاماۋدا وتىرعانى حابارلاندى.
پىكىر قالدىرۋ