Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Instagram جەلىسىندەگى پاراقشاسىندا تۇڭعىش پرەزيدەنت نۇرسۇلتان نازاربايەۆتىڭ باستاماسىمەن قۇرىلعان «Birgemiz» قورىنان 50 000 تەڭگە كولەمىندەگى ءبىرجولعى تولەمدەردى تاعى دا كىمدەردىڭ الاتىنى تۋرالى ايتتى.
«قۇرمەتتى دوستار! وزدەرىڭىزگە ءمالىم، ەلباسىنىڭ باستاماسىمەن مەملەكەت باسشىسى قولعا العان داعدارىسقا قارسى شارالارعا قوسىمشا «Birgemiz» قورى مۇقتاج قازاقستاندىقتارعا قارقىندى كومەك كورسەتۋدى جالعاستىرىپ جاتىر.
كومەك كورسەتۋدىڭ ءبىرىنشى جانە ەكىنشى كەزەڭى اياسىندا 23 قالاداعى 360 مىڭنان استام وتباسى 50 مىڭ تەڭگەدەن ءبىرجولعى تولەماقى الدى. «Jas Otan» ماڭىنا توپتاسقان 5 مىڭنان استام ۆولونتەر 240 مىڭ وتباسىعا ازىق-تۇلىك سەبەتتەرىن، مەديسينالىق ماسكالار مەن ءبىرىنشى كەزەكتە قاجەتتى زاتتاردى جەتكىزىپ بەردى. حالىقتىڭ قورعانىسى ءالسىز بولىگىنە جاتاتىن 100 مىڭ وتباسىعا تەگىن 5 ميلليون ماسكا ۇلەستىرىلدى.
تۇركىستان وبلىسىنىڭ سۋ باسقان اۋىلدارىنىڭ تۇرعىندارىنا نۇروتاندىقتار ازىق-تۇلىك، كيىم-كەشەك، قۇرىلىس ماتەريالدارى مەن جەكە گيگيەنا قۇرالدارى تۇرىندە 1000 توننا گۋمانيتارلىق كومەك جونەلتتى. «Birgemiz» قورىنىڭ قاراجاتى ەسەبىنەن دوستىق اۋىلىنىڭ تۇرعىندارى جاڭا تۇرعىن ۇيلەرمەن قامتاماسىز ەتىلەتىن بولادى»، - دەدى باۋىرجان بايبەك.
سونداي-اق، ول كۇنى كەشە ەلباسىمەن وتكەن كەزدەسۋ بارىسىندا پارتيا ءتوراعاسىنىڭ بەرگەن تاپسىرمالارىنا توقتالدى.
«كەشە ەلباسى، پارتيامىزدىڭ ليدەرى نۇرسۇلتان نازاربايەۆ 50 مىڭ تەڭگە مولشەرىندە ءبىرجولعى تولەماقى بەرۋدىڭ ءۇشىنشى كەزەڭىن ۇيىمداستىرۋدى تاپسىردى. وسى اپتانىڭ وزىندە شاعىن قالالاردىڭ، اۋىلدار مەن ءىرى قالالارعا ىرگەلەس ەلدى مەكەندەردىڭ مۇقتاج تۇرعىندارىنان تۇراتىن 110 مىڭداي وتباسىعا قوسىمشا اتاۋلى قارجىلىق كومەك كورسەتىلەتىن بولادى.
⠀
«Nur Otan» پارتياسى مەن تۇڭعىش پرەزيدەنت قورىنىڭ ۇيىمدىق قولداۋىمەن «Birgemiz» قورىنىڭ ىسكە اسىرىپ جاتقان ءتيىمدى دە اشىق جۇمىسى ءىرى مەسەناتتاردىڭ كوكەيىنە سەنىم ۇيالاتىپ وتىر. وسىلايشا تاياۋ ۋاقىتتا تاعى دا قوسىمشا قاراجات تۇسەدى دەپ كۇتىلۋدە. وسىنى ەسكەرگەن ەلباسى تىكەلەي اۋىل تۇرعىندارىنا باسىمدىق بەرە وتىرىپ، مۇقتاج قازاقستاندىقتارعا اتاۋلى كومەك كورسەتۋدىڭ ءتورتىنشى كەزەڭىن ىسكە اسىرۋ مۇمكىندىگىن پىسىقتاۋدى تاپسىردى»، - دەپ جازدى ول.
پىكىر قالدىرۋ