"بىردە-بىر گەكتار جەر بەرىلمەيدى". ق ر ەكولوگيا، گەولوگيا جانە تابيعي رەسۋرستار ۆيسە-مينيسترى ەرلان نىسانبايەۆ ىلە-الاتاۋى ۇلتتىق پاركىنە قاتىستى وتكەن كەزدەسۋدە وسىلاي مالىمدەدى.

الماتى قالاسىندا ەكولوگيا مينيسترلىگى، قوعام وكىلدەرى جانە زاڭگەر باقىتجان بازاربەكتىڭ قاتىسۋىمەن وتكەن كەزدەسۋدە ىلە الاتاۋى ۇلتتىق پاركىندەگى جەرىنە قاتىستى سۇراقتارعا جاۋاپ بەرىلدى.

كەزدەسۋ ەكولوگيا ۆيسە-مينيسترى ەرلان نىسانبايەۆتىڭ تاراپىنان زاڭگەر باقىتجان بازاربەكوۆتىڭ "Facebook"الەۋمەتتىك جەلىسىندەگى ىلە الاتاۋى ۇلتتىق پاركىنىڭ جەر ماسەلەسىنە قاتىستى سۇراقتارىنا جاۋاپ بەرۋ ماقساتىندا ۇيىمداستىرىلدى. كەزدەسۋگە ەكولوگيا مينيسترلىگىنىڭ جاۋاپتى وكىلدەرى، ۇلتتىق ساياباق باسشىلىعى، جۋرناليست ۆاديم بورەيكو، بەلگىلى قوعام وكىلدەرى مۇحتار تايجان، مۇرات ابەنوۆ، توعجان قوجالييەۆا مەن ب ا ق وكىلدەرى قاتىستى.

ەرلان نۇرالي ۇلى مينيسترلىك اشىق ديالوگقا اركەز دايىن ەكەندىگىن ايتىپ، قاجەتتى ساراپشىلاردى دا شاقىرا وتىرىپ، بارلىق ساۋالعا جاۋاپ بەردى. سونداي-اق، بارلىعى زاڭ اياسىندا جۇزەگە اسىپ جاتقاندىعىن جەتكىزدى. بۇدان بولەك، حالىقتان ەشتەڭەنى دە جاسىرمايتىنىن باياندادى.

ونىڭ ايتۋىنشا، ۇلتتىق ساياباقتىڭ بىردە-بىر گەكتارى ەگىن شارۋاشىلىعى مەن مال جايىلىمىنا بەرىلمەگەن. ۇلتتىق پاركتەگى جەردىڭ ءتۇپ ماقساتى وزگەرمەگەن. ول مەملەكەتتىڭ جەكە مەنشىگىندە.

– 16528 گەكتار جەر بىزدە، مەملەكەت يەلىگىندە. ول مەملەكەتتەن باسقا ەشكىمگە تيەسىلى ەمەس. ول جەردە ەشقانداي قىزمەت جۇرگىزىلمەگەن. ول جەر تاۋلى ايماق، ەشقانداي ينفراقۇرىلىم جوق، ول جەردە ەشتەڭە سالۋ مۇمكىن ەمەس، – دەپ اتاپ ءوتتى ۆيسە-مينيستر.

– جەردى جەكەشەلەندىرۋ تۋرالى مالىمەتتەر زاڭدى تۇردە ۋاقىتىلى راسىمدەلمەۋى ءبىزدىڭ كىنا ەمەس، – دەپ اتاپ  ءوتتى ۆيسە-مينيستر ەرلان نىسانبايەۆ.

– بۇعان بۇل بازانى جۇرگىزەتىندەر جاۋاپ بەرسىن. بۇل ەكولوگيا مينيسترلىگىنىڭ قۇزىرەتتىلىگى مەن جاۋاپكەرشىلىگىنە كىرمەيدى. كەز-كەلگەن جاعدايدا بۇل جەر ەشقايدا كەتپەيدى. ولار مەملەكەتتىڭ جەكەمەنشىگىندە بولادى، ول جەردە ەشقانداي قىزمەت جاسالمايدى. بۇعان ءوز باسىممەن جاۋاپ بەرە الامىن. بارلىق تارماقشالار بويىنشا زاڭدى تۇردە جاۋاپ بەرە الامىن، – دەدى مينيسترلىك وكىلى.

وسى سوزدەرىنىڭ دالەلى رەتىندە ول كەزدەسۋدە زاڭگەرگە جانە قوعام وكىلدەرىنە ءتيىستى قۇجاتتار مەن جەردىڭ كارتاسىن كورسەتتى. سوڭىندا ەكى تاراپ زاڭگەر باقىتجان بازاربەك ەكولوگيا مينيسترىنە ۇسىناتىن سۇراقتارعا جاۋاپ الۋ ءۇشىن تاعى ءبىر كەزدەسۋ وتكىزۋگە كەلىستى. ءوز كەزەگىندە بازاربەك مىرزا ەرلان نىسانبايەۆتان جازبالارداعى جاعىمسىز جاۋاپتار مەن ەموسيونالدىق تون ءۇشىن كەشىرىم سۇرادى. ەكى تاراپ سىندارلى ديالوگ بارىسىندا پىكىرتالاستى جالعاستىرۋعا نيەتتى ەكەندىكتەرىن جەتكىزدى.

ىلە الاتاۋى ۇلتتىق پاركىندەگى جەر ساتىلمايتىنىن جانە وزگە ەلدىڭ ازاماتتارى مەن شەتەلدىك كومپانيالارعا پايدالانۋعا بەرىلمەيتىنىن ەكولوگيا، گەولوگيا جانە تابيعي رەسۋرستار ۆيسە-مينيسترى ەرلان نىسانبايەۆ "Facebook" پاراقشاسىندا دا ءمالىم ەتتى. ۆيسە-مينيستر ىلە الاتاۋى ۇلتتىق پاركىندە ينفراقۇرىلىمدى دامىتۋعا قازاقستاندىق ينۆەستور جاۋاپتى ەكەنىن، ونداعى جەر ساتىلمايتىنىن اتاپ ءوتتى.

– الماتى جۇرتشىلىعى ىلە الاتاۋى ۇلتتىق پاركىندە ەكوتۋريزمدى دامىتۋعا قاتىستى ماسەلە كوتەرگەن ەدى. اتاپ وتسەم، 2019-2025 جىلدارعا ارنالعان تۋريستىك سالانى دامىتۋدىڭ مەملەكەتتىك باعدارلاماسى شەڭبەرىندە شەتەلدىك، ونىڭ ىشىندە اقش-تىڭ تابىستى تاجىريبەسى نەگىزىندە ۇلتتىق پاركتى دامىتۋدىڭ باس جوسپارى جاسالدى. وسىعان وراي، ءوز موينىنا ۇلتتىق پاركتىڭ ينفراقۇرىلىمىن قورشاعان ورتاعا زيان كەلتىرمەي دامىتۋ مىندەتىن العان جاۋاپتى قازاقستاندىق ينۆەستور انىقتالدى. بىردەن نازار سالاتىن جايت، ۇلتتىق پاركتەگى جەرلەر ساتىلمايدى! وزگە ەلدىڭ ازاماتتارى مەن شەتەلدىك كومپانيالارعا پايدالانۋعا بەرىلمەيدى! وعان قازاقستان رەسپۋبليكاسىنىڭ زاڭى بويىنشا تىيىم سالىنعان! 

– ۇلتتىق پاركتەردىڭ قازىرگى جاعدايىن وزدەرىڭىز كورىپ وتىرسىزدار: كاۋاپحانا، اباجاداي مەيرامحانالار، ساپاسىز قىزمەت، سۇرەڭسىز كورىنىستەر. جاعدايدى تۇبىرىمەن وزگەرتپەي بولمايدى. ءبىرىنشى ورىندا ادام مەن تابيعاتتىڭ بايلانىسى تۇرۋى ءتيىس. تيىسىنشە، جولداردى، كورۋ الاڭدارىن، وزەن ۇستىندەگى كوپىرلەردى، تابيعي ۇندەستىكتى بۇزبايتىن شاعىن نىسانداردى سالۋ كەرەك. وسىنىڭ ءبارىن جولعا قوياتىن قازاقستاندىق ينۆەستورعا جالعا نەبارى 35 گا جەر ۋچاسكەسى پايدالانۋعا بەرىلدى، – دەپ جازدى ول.

ۆيسە-مينيستر كەلتىرگەن مالىمەتكە سۇيەنسەك، ينۆەستورمەن كەزەڭ-كەزەڭمەن 10 زاماناۋي ۆيزيت-ورتالىق، 155 كم-دەن استام جاياۋ مارشرۋتتار سالادى. بۇل جوبا جاڭا جۇمىس ورىندارىن قۇرۋعا مۇمكىندىك بەرەدى، كاسىپكەرلىكتىڭ دامۋىن جانە تۋريزم سالاسىنداعى جوعارى بىلىكتى كادرلاردىڭ ءوسۋىن قامتاماسىز ەتەدى. ودان بولەك، ەرلان نىسانبايەۆ ينۆەستور بارلىق جۇمىستى قورشاعان ورتاعا زيان كەلتىرمەي ىسكە اسىراتىنىن، ال تۇرعىزىلاتىن قۇرىلىمدار زاماناۋي ەكولوگيالىق ماتەريالداردان ازىرلەنەتىنىن اتاپ ءوتتى.

ءسوز سوڭىندا باسشى ۇلتتىق پارك حالىققا اركەز قولجەتىمدى بولاتىنىن، ءتىپتى ۇلتتىق پارك جانىندا قوعامدىق كەڭەس قۇرىلاتىنىن اتاپ ءوتتى.

– ايتا كەتەرلىگى، ۇلتتىق پارك بۇرىنعىداي كەز كەلگەن قازاقستاندىق ءۇشىن قولجەتىمدى بولىپ قالا بەرەدى. ەشقانداي قورشاۋلار بولمايدى. وسى اپتا بويى الماتى جۇرتشىلىعىمەن، بەلسەندىلەرمەن، جۋرناليستەرمەن كەزدەستىك. حالىقتىڭ بارلىق تالاپ-تىلەگى ەسكەرىلەدى. ناتيجەسىندە ۇلتتىق پارك جانىندا قوعامدىق كەڭەس قۇراتىن بولىپ شەشتىك. ينۆەستوردىڭ بارلىق جۇمىستاردى ساپالى تۇردە ورىنداۋىن ءبىز حالىقپەن بىرگە قاداعالايتىن بولامىز. تابيعاتقا ەشقانداي زالال كەلمەيدى. ول قاتاڭ تۇردە قاداعالانادى، – دەپ ءسوزىن تۇيىندەدى.