كوروناۆيرۋس ينفەكسياسىن جۇقتىرعانداردىڭ اراسىندا سۋديالار دا بار. بۇل تۋرالى جوعارعى سوتتىڭ باسپا ءسوز قىزمەتىنىڭ جەتەكشىسى ايدوس ءسادۋاقاسوۆ Facebook پاراقشاسىندا جاريالادى.

– مەملەكەتتىك قىزمەتشىلەر اراسىندا دا ۆيرۋستى جۇقتىرۋ فاكتىلەرى كەزدەسۋدە. كەڭ بايتاق ەلىمىزدىڭ بارلىق وڭىرىندە دەرلىك اۋرۋ وشاقتارى انىقتالىپ وتىر. وكىنىشكە وراي، ناۋقاستانعاندار قاتارىندا ءبىرقاتار وبلىستارداعى سۋديالار مەن سوت قىزمەتكەرلەرى دە بار. ءبىراق فەيسبۋكتە كەي ادامدار «سوتتار اشىلسىن جانە سوت پروسەستەرى جۇزبە-جۇز، بەتپە-بەت وتكىزىلسىن!» دەگەن تالاپ قويۋدا، – دەپ جازدى ءسادۋاقاسوۆ.

ول ءوز سوزىندە سوتتىڭ جۇمىسىن دۇكەنمەن سالىستىرۋ ورىنسىز دەپ اتاپ ءوتتى.

– بۇل ۆيرۋس كەيبىرەۋلەر ويلاعانداي ميف ەمەس! بۇل شىنىمەن بار ءارى وتە ءقاۋىپتى دەرت. مۇنداي جاعدايدا سوتتاردىڭ اشىلۋى نەسىمەن ءقاۋىپتى؟ ەڭ الدىمەن، كەلۋشىلەردىڭ سانيتارلىق-ەپيدەميولوگيالىق نورما تالاپتارىن قاتاڭ ساقتاۋى ۆيرۋستىڭ تارالۋىن تەجەۋگە تولىعىمەن كەپىلدىك بەرمەيتىنىن ەسكەرۋ قاجەت. سوندىقتان ءقازىر سوت پروسەستەرىن تاراپتاردىڭ تىكەلەي قاتىسۋىمەن وتكىزگەن جاعدايدا ۆيرۋس قاتىسۋشىلارعا عانا ەمەس، سونىمەن قاتار سۋديالاردىڭ وزدەرىنە دە جۇعۋى ابدەن مۇمكىن. ال بۇل ءوز كەزەگىندە سوتتىڭ جابىلۋىنا اكەپ سوعادى، – دەدى ول.

ءسادۋاقاسوۆتىڭ ايتۋىنشا، ءبىر مەملەكەتتىك ۇيىم قىزمەتىن توقتاتسا، ونىڭ فۋنكسياسىن باسقا مەملەكەتتىك ورگان، ال ولاردىڭ قىزمەتكەرلەرىنىڭ مىندەتىن باسقا اۋداندار مەن وبلىستارداعى ارىپتەستەرى اتقارا الادى. ال سوتتار بۇلاي ىستەي المايدى دەپ اتاپ ءوتتى.

– سوتتى «جاۋىپ تاستاۋ» دەگەنىمىز – ونى تولىعىمەن ارەكەتسىز جاعدايعا ءتۇسىرۋ، باسقاشا ايتقاندا، وسى اۋداندا سوت ءىسىن جۇرگىزۋدى توقتاتۋعا اكەلىپ سوعادى. ويتكەنى، سوت كارانتينگە «جابىلعان» جاعدايدا سوت پروسەسىنىڭ قاتىسۋشىلارى ونىڭ «اشىلۋىن» كۇتۋىنە تۋرا كەلەدى، ول سانيتارلىق نورمالارعا سايكەس جابىلعاننان كەيىن ەكى اپتادان كەيىن عانا بارىپ اشىلۋى مۇمكىن. ال سوت وتىرىسىن كەمىندە ەكى اپتاعا كەيىنگە شەگەرۋ دەگەننىڭ نە ەكەنىن زاڭگەرلەر عانا ەمەس، ءبارىمىز جاقسى بىلەمىز. بۇل ىستەردى قاراۋ، شاعىمدانۋ مەرزىمدەرىنىڭ بۇزىلۋى جانە ت.ب. ال ىستەردى باسقا سوتتىڭ قاراۋىنا بەرۋگە بولمايدى، – دەپ جازدى ول.