الماتىنىڭ باس سانيتار دارىگەرى جەكە پروفيلاكتيكا شارالارىن ساقتاپ، ادامدار كوپ جينالاتىن ورىندارعا بارۋدان اۋلاق بولۋعا شاقىرادى.

الماتى قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى كوك بازار اۋماعىنداعى «كومپانيا دوستار-كوممەرس» بازارى قىزمەتكەرلەرىنىڭ اراسىندا كوروناۆيرۋس ينفەكسياسىن جۇقتىرۋ وقيعالارىنىڭ تىركەلۋىنە بايلانىستى ءتيىستى شارالار مەن ەپيدەميولوگيالىق زەرتتەۋ جۇرگىزۋ ءۇشىن كوك بازاردىڭ قىزمەتى توقتاتىلعانى تۋرالى حابارلادى.

الماتى قالاسىنىڭ باس مەملەكەتتىك سانيتار دارىگەرى جانداربەك بەكشين كاسىپكەرلىك سۋبەكتىلەرىنىڭ كارانتين رەجيمىن ساقتاۋىن باقىلاۋ ماقساتىندا قۇرامىندا پوليسيا دەپارتامەنتىنىڭ، تقسقبد اۋداندىق باسقارمالارىنىڭ، «اتامەكەن» كاسىپكەرلەر پالاتاسىنىڭ وكىلدەرى بار اكىمدىكتىڭ مونيتورينگتىك توپتارى جۇمىس ىستەيتىنىن اتاپ ءوتتى.

وسىعان دەيىن مونيتورينگتىك توپتاردىڭ تەكسەرۋى بارىسىندا كوك بازار اۋماعىندا جۇمىسشىلار مەن ساتۋشىلار ءۇشىن بايلانىسسىز تەرمومەتريانىڭ ساقتالماۋى، الەۋمەتتىك قاشىقتىقتىڭ ساقتالماۋى جانە كەلۋشىلەر اراسىندا قاشىقتىق ساقتاۋ ءۇشىن ارنايى بەلگىلەردىڭ بەلگىلەنبەۋى، جەكە قورعانىس قۇرالدارىن ءتيىسسىز قولدانۋ جانە ۋتيليزاسيالاۋ، ءتيىستى جۇمىس رەجيمىنىڭ ورىندالماۋى سىندى ءتارتىپبۇزۋشىلىقتار انىقتالدى.

انىقتالعان ءتارتىپبۇزۋشىلىقتارعا بايلانىستى ق ر اقتك 425-بابىنىڭ 2-تارماعىنا سايكەس اكىمشىلىك قۇقىقبۇزۋشىلىق تۋرالى حاتتاما تولتىرىلىپ، مەدەۋ اۋدانىنىڭ باس مەملەكەتتىك سانيتار دارىگەرىنىڭ 2020 جىلدىڭ 13 ماۋسىمىنان باستاپ «كومپانيا دوستار-كوممەرس» قىزمەتىن سوت شەشىمى شىققانعا دەيىن توقتاتۋ تۋرالى قاۋلىسى شىقتى. قازىرگى ۋاقىتتا اكىمشىلىك ءىستىڭ ماتەريالدارى الماتى قالاسىنىڭ مامانداندىرىلعان اكىمشىلىك سوتىنا بەرۋگە ازىرلەنۋ ۇستىندە.

بازاردىڭ اكىمشىلىگىنەن كوروناۆيرۋس ينفەكسياسىن جۇقتىرۋدىڭ ءبىرىنشى وقيعاسىن زەرتتەۋ بارىسىندا تاعى 19 جاعداي انىقتالدى، ول دا اكىمشىلىك قاتارىنان شىققان. وسىلايشا، كوك بازاردا ىندەتتى جۇقتىرعان قىزمەتكەر سانى 20-عا جەتكەن. ساتۋشىلار اراسىنان جۇقتىرۋ وقيعالارى انىقتالمادى. قايتىس بولعان ادام (بازار اكىمشىلىگىنىڭ ۇيىمداستىرۋ ءبولىمىنىڭ قىزمەتكەرى) ءولىمىنىڭ سەبەپتەرىن قالالىق قوعامدىق دەنساۋلىق ساقتاۋ باسقارماسىنىڭ جانىنداعى ءولىم سەبەپتەرىن زەرتتەيتىن كوميسسيا انىقتايتىن بولادى.

سونىمەن بىرگە، كوروناۆيرۋس ينفەكسياسىن اۋرۋ بەلگىلەرىسىز تاراتۋشىلاردىڭ انىقتالۋىنا بايلانىستى «راحات» كونديتەرلىك فابريكاسىنىڭ دا جۇمىسى توقتاتىلدى. العاشىندا 8 ادام جوعارى تەمپەراتۋرا انىقتالۋىنا بايلانىستى جۇمىسقا جىبەرىلمەدى. سونىمەن بىرگە 1450 قىزمەتكەرگە تەست جۇرگىزىلگەن. وسىعان بايلانىستى ق ر باس مەملەكەتتىك سانيتار دارىگەر قاۋلىسىنداعى تالاپتارعا سايكەس قىزمەتكەرلەر ءۇي كارانتينىنە بوساتىلدى. فابريكا اكىمشىلىگى وزدەرىنىڭ شەشىمىمەن جۇمىستى 15 ماۋسىمعا دەيىن توقتاتقان. تقسقبد اۋداندىق باسقارمالارىنا ەپيدەمياعا قارسى شارالار تولىعىمەن اياقتالعانشا فابريكا جۇمىسىن توقتاتۋ تۋرالى قاۋلى بەرىلدى.

– كورىپ وتىرعاندارىڭىزداي، سىزدەردىڭ تاراپتارىڭىزدان قاۋىپسىزدىك شارالارىنىڭ قامتاماسىز ەتىلمەۋى – پەرسونال مەن كەلۋشىلەر تەرمومەترياسى، الەۋمەتتىك قاشىقتىقتىڭ ساقتالۋىن قامتاماسىز ەتۋ، سانيتايزەرلەر مەن دەزينفەكسيالىق قۇرالدار قورىنىڭ بولۋى – سىزدەردىڭ ۇيىمدارىڭىزداعى قىزمەتكەرلەر اراسىندا اۋرۋدىڭ تاراۋىنا جانە نىساننىڭ جۇمىسىن توقتاتۋعا الىپ كەلدى. سانيتارلىق-ەپيدەميولوگيالىق قاۋىپسىزدىك رەجيم شارالارىن قاتاڭ تۇردە ساقتاۋلارىڭىزدى تالاپ ەتەمىن. ماسكا تاعۋ رەجيمىن ساقتاپ، جەكە قورعانىس قۇرالدارىن (ماسكالار، قولعاپتار) اۋىستىرىپ تۇرۋ وتە ماڭىزدى، – دەدى كاسىپكەرلەرگە قاراتا ايتقان سوزىندە ج. بەكشين.

ءوز كەزەگىندە، ازاماتتارعا ءالى دە ادامدار كوپ جينالاتىن ورىندارعا باراتىن ورىنداردان اۋلاق بولۋ جانە ءۇي كارانتينىندە بولعان كەزدە جەكە وقشاۋلانۋ قاعيداسىن قاتاڭ ۇستانۋ كەڭەسى بەرىلدى.

– قاۋىپسىزدىك شارالارىن ساقتاۋ ارقىلى سىزدەر وزدەرىڭىزدىڭ جاقىندارىڭىزدىڭ دەنساۋلىعىن ساقتايسىزدار، – دەپ اتاپ ءوتتى الماتى قالاسىنىڭ باس مەملەكەتتىك سانيتار دارىگەرى جانداربەك بەكشين.