رۋحاني جاڭعىرۋ باعدارلاماسى 2020 جىلعى جوسپارعا سايكەس ۇلتتىق بىرەگەيلىك جانە پراگماتيزم سىندى يدەولوگيالىق قۇندىلىقتاردى ناسيحاتتاۋ باعىتىندا جۇمىس ىستەيتىنى بەلگىلى.
مەملەكەت حاتشىسى باعدارلامانى ىسكە اسىرۋدا ءبىلىم مەن عىلىمعا قۇشتارلىق، ەڭبەكسۇيگىشتىك، ۇلتتىق جانە وركەنيەتتىك قۇندىلىقتاردى ناسيحاتتاۋ سياقتى شارالارعا باسىمدىق بەرۋ كەرەكتىگىن بايانداعان بولاتىن.
«رۋحاني جاڭعىرۋ» باعدارلاماسىن جۇزەگە اسىرۋ بارىسىندا ورىندالماي قالعان جوسپارلار بار». جيىندا ءسوز سويلەگەن اقپارات جانە قوعامدىق دامۋ ەكس-مينيسترى داۋرەن ابايەۆ وسىلاي دەدى. ونىڭ سوزىنشە، 209 تارماقتان تۇراتىن باعدارلامانىڭ 184ء-ى جۇزەگە اسقان. ياعني 3 جىلدا مەجە 88% ورىندالعان.
باستى ماسەلە – ەل اۋماعىنداعى كورىكتى مەكەندەردى ەل ىشىندە ناسيحاتتاۋ. الداعى ۋاقىتتا ۇلتتىق قۇندىلىقتاردى ارتتىرۋ ءۇشىن مەكتەپ باعدارلاماسىنا اباي قۇنانباي ۇلى سىندى تۇلعالاردىڭ اۋەزدى اندەرى مەن كۇمبەزدى كۇيلەرى ەنگىزىلمەك. «مەكتەپ وقۋشىلارى بۇل ءتالىمدى اۋديونۇسقادان ۇيرەنەدى»، – دەيدى ول.
بۇگىندە، رۋحاني جاڭعىراتىن ۋاقىت – كىتاپ وقۋعا، ۆيرتۋالدى كىتاپحاناعا جازىلىپ، ۆيرتۋالدى مۋزەي ارالاۋعا، سونىمەن بىرگە بالامەن ساباق وقىپ، بالانىڭ دەڭگەيىن بىلۋگە، ءتىپتى ءوز دەڭگەيىڭدى سارالاۋعا بولاتىن ساتتەر.
ينتەرنەت ايدىنىندا تەكسەرىلمەگەن مالىمەت وتە كوپ، ارزان كۇلكى دە جەتەرلىك. ەكىنشى جاعىنان، سالماقتى ءسوز، ساليقالى دۇنيە دە مۇقيتتاي. تارازىنىڭ قاي جاعىنا باسىمدىق بەرەمىز، بالامىز دا كوبىنە سول جاقتى تاڭدايدى. باعدارلامانىڭ قابىلدانعانىنىڭ 3 جىل اياسىندا نەندەي پايدالى ىستەر اتقارىلعانىن اتاپ وتەيىك.
باعدارلاماعا سۇيەنە ۇيىمداستىرىلعان تانىمال جوبا «قازاقستاننىڭ 100 جاڭا تۇلعاسى» بىزگە ارامىزداعى ەرەكشە قابىلەتتى قوعام دامۋىنىڭ كوشباسشىلارى بولاتىن 163 جاستى انىقتاپ بەردى. ءبىرى – قۋاتتى ۇنەمدەيتىن قۇرال ويلاپ تاپسا، ەكىنشىسi – 11 سىنىپتا جۇرگەندە-اق كەمبريدج ۋنيۆەرسيتەتىنە شاقىرىلعان. ەندى ءبىرى – ونەرتاپقىش.
رۋحاني جاڭعىرۋدىڭ تاعى ءبىر جەمىسى «100 جاڭا كىتاپ». بۇگىندە الەمنىڭ ۇزدىك عالىمدارىنىڭ 77 وقۋلىعى قازاق تىلىنە اۋدارىلىپ، 47ء-سى باسپادان شىقتى. بارلىعى ەلدىڭ جوعارى وقۋلارىنا جىبەرىلدى. بۇل وقۋلىقتار ساناعا سىلكىنىس اكەلگەن جانە جەمىسىن ەندى بەرە باستايتىن جاڭالىق. ەندى 23 وقۋلىق اۋدارىلادى.
«تۋعان جەر» جوباسى بولسا، مەسەناتتىق مادەنيەتتى قالىپتاستىردى. تۋعان ولكەسىن تۇلەتۋگە 12 000 مەسەنات ات سالىسىپ، 270 ملرد تەڭگەگە 5000-عا جۋىق نىسان سالىنىپ، 2142ء-سى قايتا جاڭعىرتىلدى. وڭىردە بەسىنشى، جەتىنشى سىنىپتار ولكەتانۋ كۋرسىن وقىدى. سونداي-اق كيەلى جەرلەردىڭ ءتىزىمى جاسالدى.
ال «جاھانداعى قازاقستان مادەنيەتى» جوباسى بويىنشا، التىن ادام پاندەمياعا دەيىن الەم مۇراجايلارىنا 26 شەرۋ جاساعان. بۇل ءبىزدىڭ باي مادەنيەتىمىزدى، قولونەرىمىزدى بارشا الەمگە تانىستىردى. شەتەل كىتاپحانالارىندا 34 قازاقستاندىق ادەبيەت جانە مادەنيەت ورتالىعىنىڭ اشىلۋى، اقىن-جازۋشىلاردىڭ ۇزدىك شىعارمالارىنىڭ بۇۇ-نىڭ 6 تىلىنە اۋدارىلۋى دا ۇلكەن ولجا.
ءتۇرلى پىكىر ايتىلسا دا، كەرەكتىگى ءشۇبا كەلتىرمەيتىن «توميريس»، «بالۋان شولاق» تا رۋحاني جاڭعىرۋ اياسىندا تۇسىرىلگەن. سول سەبەپتى ماماندار الىستى كوزدەيتىن، جەمىسىن جىلدار سالىپ بەرەتىن باعدارلاما دەسەدى. ول ءبىر جاعىنان تۇلعالىق دامۋ، ەكىنشى جاعىنان ۇلتتىق تۇتاستىق جانە ازاماتتىق قوعام قالىپتاستىرۋعا ىقپالىن تيگىزەتىن بىرەگەي جوبا.
اۆتور: داۋلەتحانوۆا ازيزا
پىكىر قالدىرۋ