2025 جىلدىڭ ءساۋىر ايىندا يندونەزياداعى بالي ارالىندا ەكى قازاقستان ازاماتى تۇتقىندالدى. ۇستالعان ساتتە ولاردىڭ جانىنان شامامەن 49 گرامم كريستالدى مەتامفەتامين تابىلعان. بۇل جايتقا بايلانىستى ولار ەسىرتكى زاتتارىن زاڭسىز تاراتتى دەگەن كۇدىككە ءىلىندى.
يندونەزيا زاڭناماسىنا سايكەس، مۇنداي قىلمىس ءۇشىن ءولىم جازاسى قاراستىرىلعان.
ق ر سىرتقى ىستەر مينيسترلىگى وقيعاعا قاتىستى رەسمي تۇسىنىكتەمە بەردى.
«قازىرگى ۋاقىتتا اتالعان ازاماتتارعا قاتىستى يندونەزيانىڭ قۇزىرلى ورگاندارى سوتقا دەيىنگى تەرگەپ-تەكسەرۋ جۇمىستارىن جۇرگىزىپ جاتىر. وسىعان بايلانىستى قوسىمشا اقپارات جاريا ەتۋگە جاتپايدى. قازاقستاننىڭ دجاكارتاداعى ەلشىلىگى تەرگەۋ ورگاندارىمەن جانە كۇدىكتىلەردىڭ تۋىستارىمەن تۇراقتى بايلانىس ورناتىپ وتىر. بۇل ءىس ەلىمىزدىڭ ديپلوماتيالىق وكىلدىگىنىڭ ەرەكشە باقىلاۋىندا»، – دەلىنگەن مينيسترلىك مالىمدەمەسىندە.
