سەناتتىڭ پلەنارلىق وتىرىسىندا قازاقستان مەن حالىقارالىق قايتا قۇرۋ جانە دامۋ بانكى اراسىنداعى 46 ميلليارد تەڭگە كولەمىندەگى قارىز تۋرالى كەلىسىم راتيفيكاسيالاندى. بۇل قاراجات «قازاقستاننىڭ ينكليۋزيۆ ەكونوميكاسى ءۇشىن جەدەلدەتىلگەن سيفرلاندىرۋ» جوباسىن جۇزەگە اسىرۋعا باعىتتالادى.

جوبانىڭ نەگىزگى ماقساتى — تۇراقتى سيفرلىق ينفراقۇرىلىمدى دامىتۋ جانە اۋىل تۇرعىندارىن جوعارى جىلدامدىقتاعى ينتەرنەتپەن قامتاماسىز ەتۋ.

باستى مىندەتتەرگە مىنالار كىرەدى:

• قالا مەن اۋىل اراسىنداعى سيفرلىق تەڭسىزدىكتى ازايتۋ ماقساتىندا اۋىلدىق ەلدىمەكەندەردى ينتەرنەت جەلىسىنە قوسۋ؛

• وڭىرلەردەگى شاعىن جانە ورتا بيزنەستى، قاشىقتان قىزمەت كورسەتۋ مەن ينۆەستيسيالاردى قولداۋ؛

• مەملەكەت پەن جەكە سەكتور اراسىنداعى سەرىكتەستىك ارقىلى تەلەكوممۋنيكاسيالىق ينفراقۇرىلىمدى دامىتۋ.

جوبا اياسىندا رەسپۋبليكالىق بيۋدجەتتەن قوسىمشا قاراجات بولىنبەيتىنى جانە ونىڭ تەرىس الەۋمەتتىك-ەكونوميكالىق سالدارعا اكەلمەيتىنى اتاپ ءوتىلدى.