جامبىل وبلىسىندا مەكتەپ وقۋشىلارىنىڭ جاپپاي توبەلەسى كەزىندە ءبىر ءجاسوسپىرىم كوز جۇمدى. 

قايعىلى وقيعا ماۋسىمنىڭ 12-نەن 13-نە قاراعان ءتۇنى ساعات 23:40 شاماسىندا بولعان. 5 بالاعا 16 جەتكىنشەكتىڭ جابىلۋى سالدارىنان، 15 جاستاعى ورالبەك كەتەبايەۆ 8 جەردەن پىشاق جاراقاتىن الادى.

مارقۇم 00:40 تا ەمحاناعا جەتكىزىلىپ، اۋرۋحانا توسەگىندە جان تاپسىرادى. ال، تۋىستارى مەديسينالىق كومەك ۋاقىتىلى كورسەتىلگەندە بالا جانىن ساقتاپ قالۋعا بولار ەدى دەيدى.

– قان جوق، قان كەرەك، قانعا باراتىن ادام جوق، دەپ جۇرە بەرگەنشە ءبىر ارەكەت جاسامادىڭىزدار ما دەپ ايتتىم. مەنىڭ قولىمنىڭ نە كەرەگى بولدى ادام جانىن ساقتاۋ ءۇشىن. بىرەۋدىڭ شىجبايلاپ تاستاعان سياسى قۇندى بولىپ تۇر ما ادامنىڭ ومىرىنەن؟، – دەدى مارقۇم ورالبەك كەتەبايەۆتىڭ اكەسى بەيسەمباي قۇتىشيەۆ.

توبەلەس كەزىندە مارقۇمنىڭ جانىندا بولعان اۋىل بالالارىنىڭ ايتۋىنشا، قاقتىعىس مەكتەپتەگى فۋتبول الاڭىنان باستالعان. كۇندىز ويىن كەزىندە قىزعا ءتيسىپ، ەرەگەسىپ، كەيىن جولىعىپ ماسەلەنى جۇدىرىقپەن شەشپەك بولعان. سالدارىنان، ءبىرى ءولىپ، ءبىرىنىڭ مۇرىن سۇيەگى سىنىپ، اۋرۋحاناعا جەتكىزىلگەن. تاعى 3-ەۋى جەڭىل جاراقات العان.

– ءبىز قۋالادىق. سول كەزدە توبەلەس باستالىپ كەتتى. ورال مەن زەننالادين دەگەن بالانى كوتەرىپ انا جاققا قاراي قاشتىق. ورال ءجۇرىپ كەلە جاتقاندا  جاعدايى جاقسى ەدى. ءبىراق، جەمپىرىنىڭ ءبارى قان ەدى. بەتىنە سۋ شاشىپ، قان اققان جەردى باسىپ تۇردىق، – دەدى ورالبەكتىڭ دوسى اسقار جانە سانجار.

ال، اق حالاتتىلار ورابەك كوپ قان جوعالتىپ، كەۋدە تۇسىنان العان جاراقاتى جۇرەك پەن وكپەنى زاقىمداعاندىقتان امان الىپ قالا المادىق دەيدى.

وتا ۇستەلىنە اپارعاندا جەتكىنشەكتىڭ جۇرەگى توقتاپتى.

قازىرگى ۋاقىتتا بۇل ىسپەن پوليسيا اينالىسىپ جاتىر. توبەلەسكە قاتىسقانداردىڭ بارلىعىن ۇستاپ، جاۋاپ الىندى.

– جالپى توبەلەسكە قاتىسى بارلاردىڭ بارلىعى انىقتالىپ، جاۋاپ الىنۋدا. اتالعان دەرەك بويىنشا، قىلمىستىق كودەكستىڭ 99-بابى 2-بولىمىمەن سوتقا دەيىنگى تەرگەۋ امالدارى باستالدى. كۇدىكتى ۇستالىپ، تاراز قالاسىنىڭ ۋاقىتشا ۇستاۋ يزولياتورىنا قاماۋعا الىندى. ءبىرقاتار ساراپتامالار تاعايىندالدى، – دەدى جامبىل وبلىستىق پوليسيا دەپارتامەنتىنىڭ باسپا ءسوز حاتشىسى گۇلسارا مۇحتارقۇلوۆا.

باۋىر ەتى بالاسىنان ايىرىلعان وتباسى ەندى تەرگەۋدىڭ ادال ءوتىپ، كىنالىلەردىڭ لايىقتى جازالانۋىن تالاپ ەتۋدە.