قاراعاندى وبلىسىنىڭ تۇرعىنى، بەلسەندى عالى باقتىبايەۆتى تاپسىرىسپەن ءولتىردى دەپ ايىپتالعان كۇدىكتى يمان مياشوۆ وزىنە تاعىلعان ايىپقا قارسىلىق رەتىندە اشتىق جاريالادى. قاراعاندى تەرگەۋ يزولياتورىندا جاتقان كۇتىكتىنىڭ تۋىستارى قازاقستان بيلىگىن جاعدايعا ارالاسۋعا شاقىردى.

– ۇلىمدى ءبىر جىلعا جۋىق قاماۋدا ۇستاپ وتىر. پوليسيا ونى كىسى ءولتىردى دەپ ايىپتايدى. ول كۇنى بالام ۇيدە بولمادى، دوسىمەن بىرگە تۋعان كۇن تويلاعان، ونىڭ ەشقايدا بارماعانىن راستايتىن كۋاگەرلەر بار. پرەزيدەنتتىڭ مەنى ەستۋىن جانە ارالاسۋىن وتىنەمىن، – دەيدى كىسى ءولتىردى دەپ ايىپتالعان مياشوۆتىڭ اناسى ءلاززات قاسىموۆا.

وبلىستىڭ قىلمىستىق-اتقارۋ جۇيەسى دەپارتامەنتىنىڭ ايتۋىنشا، تەرگەۋ بويىنشا قاماۋعا الىنعان مياشوۆتىڭ تاماقتان باس تارتىپ، تەك سۋ ىشۋگە بولاتىن اشتىق جاريالاعانى تۋرالى مالىمدەمەسى 4 ماۋسىمدا تۇسكەن.

"ەر ازاماتتىڭ جاعدايى قاناعاتتانارلىق، مەديسينا قىزمەتكەرلەرىنىڭ باقىلاۋىندا. اك-159/1 مەكەمەسىندە ەكى رەت ءوزىنىڭ دەنساۋلىعىنا قاساقانا زاقىم كەلتىرگەن، ەكى جاعدايدا دا وعان مەكەمە جاعدايىندا مەديسينالىق كومەك كورسەتىلدى. اۋرۋحانۋعا جاتقىزۋعا مۇقتاج ەمەس. مياشوۆ بۇل ارەكەتتەرىن قىلمىستىق ءىستىڭ تەرگەلۋىمەن كەلىسپەيتىنىن ءبىلدىرۋ ءۇشىن جاساعانىن ايتادى. مەكەمە اكىمشىلىگىنە شاعىمى جوق" دەپ جازدى دەپارتامەنت باستىعىنىڭ ورىنباسارى بەكبولات شاكىروۆ رەتىندە.

مياشوۆ – قاراعاندى وبلىسى جاڭاارقا اۋدانىنىڭ تۇرعىنى بەلسەندى عالى باقتىبايەۆتى ءولتىردى دەپ ايىپتالعان ءتورت كۇدىكتىنىڭ ءبىرى. اۋدانىنىڭ الەۋمەتتىك ماسەلەلەرىن كوتەرىپ جۇرگەن بەلسەندىنى 2019 جىلى 28 مامىرعا قاراعان ءتۇنى ءوز ءۇيىنىڭ الدىندا باسىنا وق اتىپ ءولتىرىپ كەتكەن.