ەلباسى، «Nur Otan» پارتياسىنىڭ ليدەرى نۇرسۇلتان نازاربايەۆتىڭ باستاماسىمەن حالىقتىڭ الەۋمەتتىك جاعىنان ءالسىز توبىنا قولداۋ كورسەتۋ ءۇشىن قۇرىلعان «Birgemiz» قورىنا قوسىمشا تاعى 4 ملرد. تەڭگە ءتۇستى. بۇل قاراجات اسا مۇقتاج وتباسىلارعا كومەك كورسەتۋدى جالعاستىرۋعا مۇمكىندىك بەرەدى.

قور ءتوراعاسى رۋسلان ساكەيەۆتىڭ مالىمدەۋىنشە، قاراجات قوعام ومىرىنە بەيجاي قارامايتىن ءتورت ازاماتتان تۇسكەن. ولار ءوز ەسىمدەرىن اتاماي-اق قويۋدى قالاعان. جالپى، ەلباسىنىڭ ۇندەۋىنە قولداۋ بىلدىرگەن مەسەناتتاردىڭ ارقاسىندا «Birgemiz» قورىنىڭ ەسەپشوتىندا 28،5 ملرد. تەڭگەدەن استام قاراجات جيناقتالعان.

تۇڭعىش پرەزيدەنتتىڭ تاپسىرماسى بويىنشا وسى قاراجات ەسەبىنەن بۇگىنگى تاڭدا 470 مىڭنان استام وتباسى نەمەسە 1،6 ملن. قازاقستاندىق اتاۋلى كومەكپەن قامتىلدى. 23 قالانىڭ جانە ولارعا ىرگەلەس اۋىلدار مەن ەلدى مەكەندەردىڭ اسا مۇقتاج وتباسىلارى 50 مىڭ تەڭگەدەن ءبىرجولعى تولەماقى الدى.

سونىمەن بىرگە كوروناۆيرۋسپەن كۇرەسكە جۇمىلدىرىلعان 2 مىڭنان استام مەديسينا قىزمەتكەرى دە قور قاراجاتىنان 50 مىڭ تەڭگەدەن الدى.

«Jas Otan» ۆولونتەرلارى قورعانىسى ءالسىز 100 مىڭنان استام وتباسىعا «Birgemiz» قورىنىڭ قاراجاتىنا ساتىپ الىنعان 5 ميلليون ماسكانى تەگىن جەتكىزىپ بەردى.

سونىمەن قاتار نۇرسۇلتان نازاربايەۆتىڭ باستاماسى بويىنشا تۇركىستان وبلىسىنىڭ ماقتاارال اۋدانىندا سۋ باسۋدان زارداپ شەككەن دوستىق اۋىلىنىڭ تۇرعىندارىنا ارنالعان جاڭا ۇيلەردىڭ قۇرىلىسى جۇرگىزىلىپ جاتىر.