شىمكەنتتە كارانتين شەكتەۋلەرى 6 شىلدەگە دەيىن ۇزارتىلدى. بۇل تۋرالى كوروناۆيرۋسقا قارسى شەكتەۋ شارالارى جونىندە وتكەن بريفينگتە قالا اكىمىنىڭ ءبىرىنشى ورىنباسارى ەربول سادىر مالىمدەدى.

– قالامىزدا شەكتەۋ شاراسى 22 ماۋسىمعا دەيىن ەدى. ەندى كارانتين 6 شىلدەگە دەيىن سوزىلىپ وتىر. ودان بولەك، كەيبىر شەكتەۋ شارالارى ەنگىزىلەدى. ارنايى توپپەن قوعامدىق كولىكتەر مەن قوعامدىق ورىنداردى ارالاپ شىقتىق. وكىنىشكە قاراي، ساقتىق شارالارى دۇرىس ساقتالماعان. مۇنىڭ ءبارى قالاداعى ەپيدەميولوگيالىق جاعدايدىڭ كۇردەلەنۋىنە اكەلىپ سوعادى. وسىعان بايلانىستى دەمالىس كۇندەرى قالاداعى كەيبىر نىساندار ءوز جۇمىسىن توقتاتادى. ياعني، سەنبى، جەكسەنبى كۇندەرى بارلىق ازاماتتار ءوز وتباسىمەن ۇيىندە وتىرۋى كەرەك. ەگەر ءبىز وسىنداي شارالاردى ساقتامايتىن بولساق، كوروناۆيرۋستى اۋىزدىقتاۋ مۇمكىن ەمەس. الداعى 20-21 ماۋسىمنان باستاپ قالاداعى ويىن-ساۋىق ورتالىقتارى، ءىرى ساۋدا ورىندارى، بازارلار، ساۋدا ۇيلەرى مەن ورتالىقتارى، فيتنەس ورتالىقتارى، باسسەيندەر جانە سپورت نىساندارىنىڭ جۇمىسى توقتايدى. بۇل تەك سەنبى، جەكسەنبى كۇندەرى. وسى ورايدا كوپقاباتتى تۇرعىن ۇيلەردىڭ اۋماعىنداعى ازىق-تۇلىك جانە قالاداعى كوتەرمە بازار «جىبەك جولى» مەن «قازىبەك» بازارى جۇمىسىن ىستەيدى، – دەدى قالا اكىمىنىڭ ءبىرىنشى ورىنباسارى.

ول ءوز سوزىندە، قوعامدىق تاماقتانۋ ورىندارىنىڭ جۇمىسى توقتايتىنىن جانە تەك قانا اشىق دالادا تاماقتانۋ ورنى بار سانيتارلىق نورمالاردى ساقتاعان ورىندار عانا ءوز جۇمىسىن جالعاستىراتىنىن اتاپ ايتتى.

ال، قوعامدىق كولىك سەنبى، جەكسەنبى كۇندەرى تولىق توقتايدى. باسقا كۇندەرى مەرزىمىنە شەكتەۋلەر ەنگىزىلىپ، تاڭعى ساعات 07:00-دەن 11:00-گە دەيىن جانە تۇستەن كەيىن 17:00-دەن كەشكى ساعات 20:00-گە دەيىن عانا جۇرەدى.

– 22 ماۋسىمنان باستاپ حقو جانە جۇمىسپەن قامتۋ ورتالىعىنىڭ جۇمىسىنا دا شەكتەۋ قويىلادى. ولار تاڭعى ساعات 08:00-دەن 12:00-گە دەيىن عانا جۇمىس ىستەيدى. ونىڭ وزىندە ونلاين كورسەتىلمەيتىن قىزمەتتەردى عانا ىسكە اسىرادى. مۇندا كەلەتىن ازاماتتار ونلاين كەزەككە تۇرۋى كەرەك. سونىمەن قاتار، حالىق كوپ جينالاتىن كوشەلەر، ارباتتار، سكۆەرلەر، سپورتتىق جانە بالالارعا ارنالعان الاڭشالار، تۋريستىك ورىندار، ساياباقتاردىڭ بارلىعى جۇمىسى توقتاتادى. ودان بولەك، قالاداعى وفيستە، مەملەكەتتىك مەكەمەلەردە جۇمىس جاسايتىن كاسىپورىنداردىڭ بارلىعىنا جۇمىسشىلارىنىڭ 80%-نا دەيىن ونلاين رەجيمدە جۇمىس ىستەۋگە كوشۋ تۋرالى شەشىم قابىلدانعان، – دەدى قالا اكىمىنىڭ ءبىرىنشى ورىنباسارى.

اتالعان شەكتەۋ شارالاردىڭ بارلىعى تۇرعىنداردىڭ دەنساۋلىقتارىنىڭ ساقتاۋ ءۇشىن جاسالىپ جاتقانىن اتاپ ءوتتى.