ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ كارانتين كۇشەيتىلگەننەن كەيىن 42 500 تەڭگەنىڭ تولەنۋىنە قاتىستى پىكىر ءبىلدىردى.

– ەندى 42 500 تەڭگە تولەنبەيدى. ونى جوسپارلاپ تا وتىرعان جوقپىز. 42 500 الەۋمەتتىك تولەمىنە بيۋدجەتتەن قارجى قاراستىرىلماعان. توتەنشە جاعداي كەزىندە 42 500 تەڭگە تولەۋگە ءبىراز قاراجات جۇمسالدى، – دەدى نۇرىمبەتوۆ.

ونىڭ ايتۋىنشا، توتەنشە جاعداي كەزىندە 8 ملن-نان استام ادام 42 500 تەڭگەگە ءوتىنىش بەرگەن.

– بىزگە ۇلتتىق بانك تج ۋاقىتىندا كوپ كومەگىن كورسەتتى. ول قور اكتيۆتەرىن ساتۋ، قارجى قۇرالدارىن جابۋ ارقىلى قاجەتتى اقشا قاراجاتىن بوساتىپ بەردى. سونىڭ ارقاسىندا مەملەكەتتىك الەۋمەتتىك ساقتاندىرۋ قورى 322 ملرد تەڭگە اكتيۆىن جۇمساپ، 4 ملن 607 مىڭ ادام 42 500 تەڭگەدەن الدى. سول سەبەپتى بۇگىنگى كۇنى مەملەكەتتىك الەۋمەتتىك ساقتاندىرۋ قورىنىڭ قارجىلىق مۇمكىندىگى شەكتەلىپ وتىر. ەگەر احۋالعا بايلانىستى قانداي دا ءبىر تولەمدەر جاساۋ قاجەتتىلىگى تۋىنداپ جاتسا، وندا باسقا قارجى كوزدەرىن قاراستىرامىز، – دەدى مينيستر.