ءناۋرىز-ساۋىر ايلارىندا كارانتيندىك شارالاردىڭ ەنگىزىلۋىنە بايلانىستى 4،2 ملن قازاقستاندىق ۋاقىتشا جۇمىسسىز قالعان. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى.

– وسى جىلدىڭ ءى توقسان قورىتىندىسىندا ەكونوميكادا جۇمىسپەن قامتىلعانداردىڭ سانى 8،8 ملن ادامدى، جۇمىسسىزدىق دەڭگەيى 4،8%-دى قۇرادى. ءناۋرىز-ساۋىر ايلارىندا كارانتيندىك شارالاردىڭ ەنگىزىلۋىنە بايلانىستى 4،2 ميلليون قازاقستاندىق ۋاقىتشا جۇمىستان بوساتىلدى. كارانتيندىك شارالاردى جەڭىلدەتۋ ۇستىمىزدەگى جىلدىڭ 20 ساۋىرىندە باستالدى. بۇل كەزەڭ-كەزەڭىمەن جۇمىسقا ورالۋعا مۇمكىندىك بەردى. ۇكىمەت جۇمىسپەن قامتۋعا كوڭىل ءبولىپ، ەكونوميكانى قالپىنا كەلتىرۋ بويىنشا قابىلداپ وتىرعان شارالار وسى جىلدىڭ شىلدە ايىنان باستاپ ەڭبەك نارىعىنداعى جاعدايدى تۇراقتاندىرادى دەپ ەسەپتەيمىز، – دەدى ءبىرجان نۇرىمبەتوۆ.

ول وسى جىلى جۇمىسپەن قامتۋعا جاردەمدەسۋ شارالارىنا 1 ملن 220 مىڭ ادامدى تارتۋ جوسپارلانىپ وتىرعانىن اتاپ ءوتتى.

– ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن ىسكە اسىرۋ اياسىندا – 600 مىڭ ادام، جۇمىسپەن قامتۋدىڭ جول كارتاسى اياسىندا – 255 مىڭ ادام، باسقا مەملەكەتتىك باعدارلامالار بويىنشا 364 مىڭ ادام جۇمىسپەن قامتىلادى، – دەدى ءبىرجان نۇرىمبەتوۆ.

ءمينيستردىڭ ايتۋىنشا، 1 ماۋسىمداعى جاعداي بويىنشا 224 مىڭنان استام ادام «ەڭبەك» مەملەكەتتىك باعدارلاماسىنا قاتىسىپ، ولاردىڭ 185 مىڭى جۇمىسقا ورنالاستىرىلدى. مەملەكەتتىك قولداۋ شارالارى اياسىندا بوس جۇمىس ورىندارىنا 99 مىڭ ادام، قوعامدىق جۇمىستارعا – 62 مىڭ، الەۋمەتتىك جۇمىس ورىندارىنا – 13 مىڭ، جاستار پراكتيكاسى بويىنشا 11 مىڭ ادام جۇمىسپەن قامتىلدى.