"قازاقستاننىڭ تۇرعىن ءۇي قۇرىلىس جيناق بانكى" اق 1 شىلدەدەن باستاپ وتباسىن جاڭادان قۇرعان جانۇيالارعا ءتيىمدى شارتتارمەن پاتەر الۋعا مۇمكىندىك بەرەتىن "جاس وتباسى" جاڭا تۇرعىن ءۇي باعدارلاماسىن ىسكە قوستى.

جاڭا باعدارلاما بويىنشا نەسيە مولشەرلەمەسى جىلدىق 6 پايىزعا تەڭ. بۇل تەك العاشقى ەكى جىلداعى مولشەرلەمە كولەمى، ال ودان كەيىن جىلدىق مولشەرلەمە 5 پايىزعا دەيىن تومەندەيدى.

باعدارلاماعا قاتىسۋ ءۇشىن ەرلى-زايىپتىلاردىڭ ءبىرى نەمەسە ەكەۋى "تۇرعىن ءۇي قۇرىلىس جيناق بانكىندە" "جاس وتباسى" دەپوزيتىن اشىپ، ءبىر جىل ىشىندە بولاشاق پاتەرلەرىنىڭ 50% جيناپ باعالاۋ كورسەتكىشىنىڭ "5ء-شى" دەڭگەيىنە جەتۋى كەرەك. دەپوزيتتى اشار كەزدە، ولاردىڭ نەكەگە تۇرعان مەرزىمى 3 جىلدان اسپاۋى ءتيىس (نەكەگە تۇرۋ تۋرالى كۋالىككە سايكەس).

قاراجاتتى جيناقتاۋ كەزىندە وعان جىلدىق 2% كولەمىندە بانك سىياقىسى مەن 20% مولشەرىندە جىل سايىنعى مەملەكەت سىياقىسى (200 اەك-تەن اسپايتىن سوماعا ەسەپتەلىنەدى) تۇسەدى. ەرلى-زايىپتىلار دەپوزيتتى ءارقايسىسى ءوز اتىنا اشىپ، كەيىننەن شوتتاردى "وتباسىلىق پاكەتكە" بىرىكتىرۋ ارقىلى مەملەكەت سىيلىقاقىسىن ەكى ەسەلەي الادى.

"جاس وتباسى" باعدارلاماسىنىڭ تاعى ءبىر ارتىقشىلىعى – وعان قاتىسۋ بارىسىندا ەرلى-زايىپتىلاردىڭ جاس مولشەرى مەن وتباسىنداعى بالالار سانىنا نازار اۋدارىلمايدى.

باعدارلاما شارتتارىنا سايكەس، جاس وتباسىلار پاتەردى جاڭا جانە قولدانىستاعى ۇيلەردەن الا الادى. نەمەسە جەر تەلىمىن ساتىپ الىپ، ءۇي سالۋلارىنا دا بولادى. ولارعا زاەم 6 جىلدان 9 جىلعا دەيىنگى مەرزىمگە بەرىلەدى.