الماتىدا جىل باسىنان بەرى مەملەكەتتىك باعدارلاما اياسىندا ءوز كاسىبىن اشۋ ءۇشىن 700-دەن استام ادام 555 مىڭ تەڭگە كولەمىندە گرانت الدى. بۇل تۋرالى الماتى قالاسى الەۋمەتتىك ءال-اۋقات باسقارما باسشىسىنىڭ ورىنباسارى دانيار الكەباي ۇلى ونلاين بريفينگ بارىسىندا مالىمدەدى.

ونىڭ ايتۋىنشا، «باستاۋ بيزنەس» كۋرسىنان وتكەن 706 ادام قارجىلاي گرانتقا يە بولعان، ول ادامدار ءقازىر ءوز كاسىپتەرىن اشىپ، جۇمىس ىستەۋدە.

«ەڭبەك» مەملەكەتتىك باعدارلاماسىنىڭ ەكىنشى باعىتى اياسىندا جاڭا بيزنەس يدەيالاردى جۇزەگە اسىرۋعا، جەكە بيزنەس اشۋعا نەمەسە قولدانىستا كاسىپتى كەڭەيتۋگە 555مىڭ تەڭگەگە دەيىن گرانتتار قاراستىرىلعان. بۇگىنگى كۇنى 706 ادام 392،3 ملن تەڭگەگە گرانت الدى. وسى جوباعا قاتىسام دەۋشىلەر جۇمىسپەن قامتۋ ورتالىعىنا جۇگىنە الادى»،– دەدى دانيار الكەباي ۇلى.

سونىمەن قاتار، ول «جۇمىسپەن قامتۋدىڭ جول كارتاسى باعدارلاماسى» بويىنشا 103،9 ملرد تەڭگەگە 216 ينفراقۇرىلىمدىق جوبا جۇزەگە اسىرىلاتىنىن ايتتى.

«ينفراقۇرىلىمدىق جوبالاردى ىسكە اسىرۋ اياسىندا جۇمىسسىز جاستارعا باسىمدىق بەرىلەدى. بارلىعى 26 مىڭ جاڭا جۇمىس ورنىن قۇرۋ جوسپاردا. بۇگىنگى تاڭدا اتالعان جوبا اياسىندا 14،3 مىڭ جۇمىس ورنى قۇرىلدى، ونىڭ ىشىندە 12 مىڭ ادام جۇمىسپەن قامتۋ ورتالىعى ارقىلى ورنالاستى»، – دەدى ول.