الەۋمەتتىك جەلىنىڭ تەرىس سالدارى رەتىندە ساراپشىلار تاۋەلدىك پەن ول جەردەگى قارىم-قاتىناستى ءجيى ايتىپ ءجۇر.
پسيحولوگ شولپان اكىموۆا جەلىدە ۋاقىتىن كوپ وتكىزەتىن جاسوسپىرىمدەرگە كوپ كوڭىل ءبولۋ قاجەت ەكەنىن، ويتكەنى ولاردىڭ جاسىندا پسيحيكالارى تۇراقتى ەمەس جانە عالامتورعا تاۋەلدىك دەپ اتالاتىن پسيحولوگيالىق اۋرۋ پايدا بولاتىنىن ايتادى.
– عالامتورعا تاۋەلدىك – ءارتۇرلى كەشەندەردىڭ پايدا بولۋىنا سەبەپ بولۋى مۇمكىن پسيحولوگيالىق اۋىتقۋ. بالا وسىنداي اۋىتقۋعا تاپ بولماۋ ءۇشىن الەۋمەتتىك جەلىلەردەگى ءوز اككاۋنتتارىنا قانشالىقتى ءجيى كىرەتىنىن قاداعالاۋى قاجەت. سونداي-اق عالامتوردى پايدالانۋ ۋاقىتىن شەكتەۋ كەرەك. ەگەر ءجاسوسپىرىم بۇعان اگرەسسيۆتى ارەكەت ەتسە، وندا ءارتۇرلى شارالار قولدانۋ كەرەك. بۇل اۋرۋ مەكتەپتەگى جاسوسپىرىمدەردىڭ ۇلگەرىمىنە، سونداي-اق ولاردىڭ دۇنيەتانىمىنا اسەر ەتەدى. ستاتيستيكاعا سايكەس، بالالاردىڭ 23 پايىزى الەۋمەتتىك جەلىلەردە اپتاسىنا 7 ساعاتتان 14 ساعاتقا دەيىن، 57 پايىزى 14-21 ساعاتقا دەيىن، 20 پايىزى 21 ساعاتتان ارتىق ۋاقىت وتكىزەدى. ءاربىر بەسىنشى بالا اپتانىڭ جەتى كۇنىنىڭ ءبىرىن الەۋمەتتىك جەلىگە جۇمسايدى، – دەيدى پسيحولوگ.
پسيحولوگتىڭ ايتۋىنشا، 28 جاستان 45 جاسقا دەيىنگى جالعىز باستى ادامدار الەۋمەتتىك جەلىلەرگە ۇلكەن ءۇمىت ارتاتىن كورىنەدى.
– ولار عالامتور ارقىلى تانىسۋ وڭاي دەپ ويلايدى. ستاتيستيكاعا سايكەس، الەمدەگى ءاربىر بەسىنشى وتباسى الەۋمەتتىك جەلى ارقىلى تانىسقان. ءبىراق مۇنىڭ كەرى جاعى دا بار. ءاربىر ءۇشىنشى اجىراسۋ الەۋمەتتىك جەلىلەرگە بايلانىستى ورىن الادى. الەۋمەتتىك جەلىلەردە تانىسۋدان كەيىن كوزگە ءشوپ سالۋ سانى ءۇش ەسە ءوستى. ۆيرتۋالدى الەمدەگى ايەلدەرمەن سويلەسە وتىرىپ، ەرلەر ولارعا قامقورلىق جاساۋدى ۇمىتىپ قالۋى مۇمكىن. ۆيرتۋالدى قارىم-قاتىناس نازىك جاندىلارعا دا اسەر ەتەدى، ويتكەنى ولار اشىق فوتوسۋرەتتەر مەن جەكە ءومىرى تۋرالى مالىمەتتەردى كوپشىلىك نازارىنا سالا وتىرىپ، وزدەرىنىڭ جۇمباقتىعىن جوعالتادى. بۇل دا شاڭىراقتىڭ شايقالۋىنا بىردەن ءبىر سەبەپ بولۋى ابدەن مۇمكىن، – دەيدى ش.اكىموۆا.
«Media System» كومپانياسىنىڭ «Brand Analytics» سەرۆيسى ۇسىنعان مالىمەت بويىنشا، بيىل ماۋسىم ايىندا قازاقستاندىقتار كوبى «ۆكونتاكتە» جەلىسىندە وتىرعان. سەرۆيستى ءبىر ايدا 1 309 669 ادام قولدانعان. ولار 16 629 521 حابارلاما جاريالاعان. رەسەيلىك جەلىنى پايدالاناتىنداردىڭ 59 پايىزى ەر ادامدار بولسا، 41 پايىزى – ايەلدەر. بۇل الەۋمەتتىك جەلىدە كوبىنە 18 جاسقا دەيىنگى جاستار وتىرادى ەكەن.
ەكىنشى ورىندا – Instagram جەلىسى. ونى قازاقستاندا 1 ميلليوننان استام ادام قولدانادى. ولاردىڭ كوبى، ياعني 71،9 پايىزى – ايەلدەر، قالعان 28،1 پايىزى – ەرلەر.
ءۇشىنشى ورىندا – Facebook تۇر. اتالمىش جەلىنى قازاقستاندا ءبىر ايدا 326 887 ادام قولدانسا، ولاردىڭ كوبى، ياعني 58 پايىزى – ايەلدەر، قالعان 42 پايىزى – ەرلەر. ولار ءبىر اي ىشىندە 9 673 614 حابارلاما جاريالاعان. نەگىزگى اۋديتوريا، ياعني Facebook جەلىسىن قولداناتىنداردىڭ 37 پايىزى – 35-44 جاس ارالىعىنداعى ادامدار.
Twitter جەلىسىندە 26 101 قازاقستاندىق وتىرسا، ولاردىڭ 41 پايىزى – ايەل ادامدار، قالعان 59 پايىزى – ەر ادامدار. 730 703 حابارلاما جاريالاعان.
