الماتى اكىمى باقىتجان ساعىنتايەۆ قالانىڭ دەنساۋلىق ساقتاۋ جۇيەسى جۇكتەمەسىنىڭ وسۋىنە وراي العاشقى مەديسينالىق-سانيتارلىق كومەك كورسەتۋ قىزمەتىنىڭ كۇشەيتىلەتىنى تۋرالى ايتتى.

قالا باسشىسى Instagram-داعى ءوزىنىڭ پاراقشاسىندا سانيتارلىق-ەپيدەميولوگيالىق جاعدايدى تۇراقتاندىرۋ شارالارى جانە پاندەميا جاعدايىندا قالالىقتارعا مەديسينالىق كومەك كورسەتۋ تۋرالى جازدى.

«بۇگىندە كوروناۆيرۋستىڭ تارالۋىنا بايلانىستى قالالىق دەنساۋلىق ساقتاۋ جۇيەسىنىڭ بارلىق مۇمكىن رەسۋرستارى جۇمىلدىرىلدى. جۇقپالى جانە پروۆيزورلىق ستاسيونارلاردان بولەك نەگىزگى سالماق العاشقى مەديسينالىق-سانيتارلىق كومەك قىزمەتىنە جۇكتەلدى. ەڭ اۋەلى وسى قىزمەتكە جۇگىنگەندىكتەن، بۇل – مەديسينالىق كومەك كورسەتۋدىڭ نەگىزى بولىپ تابىلادى»، — دەدى ب. ساعىنتايەۆ.

قالا اكىمىنىڭ مالىمەتى بويىنشا، بۇگىنگى قالىپتاسقان جاعدايدا «ۆيرتۋالدى جۇقپالى اۋرۋلار اۋرۋحاناسى» اشىلدى. ەمحانالاردا COVID-19 دياگنوزى راستالعان جانە سيمپتومدارى بار پاسيەنتتەردى مونيتورينگىلەۋ بويىنشا ءموبيلدى بريگادالار قۇرىلدى.

بۇلاردان وزگە، اسفەندياروۆ مەدۋنيۆەرسيتەتىمەن بىرلەسىپ، كارديولوگيا جانە ىشكى اۋرۋلار عزي-نىڭ بازاسىندا پاسيەنتتەرگە مونيتورينگ جۇرگىزەتىن ورتالىق اشىلدى.

«ونىڭ مىندەتى – ءقاۋىپ توبىنداعى پاسيەنتتەردى تاۋلىك بويى باقىلاۋ جانە ەمدەۋ. بۇل بىزگە امبۋلاتورلىق دەڭگەيدە، اسىرەسە قارتتار اراسىنداعى اسقىنۋلاردى ازايتۋعا مۇمكىندىك بەرەدى»، — دەپ جازدى ب. ساعىنتايەۆ.

الماتى اكىمى قالانىڭ دەنساۋلىق ساقتاۋ جۇيەسىنە ءتۇسىپ وتىرعان جۇكتەمەنىڭ ارتقانى تۋرالى دا حابارلادى. تەك سوڭعى ايدا قالادا جرۆي مەن پنيەۆمونيا اۋرۋلارىنىڭ سانى 5 ەسە ءوستى، ال بۇل ىندەتتىڭ كورىنىسى رەتىندە قاراستىرىلۋدا.

دەمەك، جەدەل جاردەم قىزمەتىنە جۇگىنۋشىلەردىڭ سانى دا كۇرت ۇلعايعان. ەگەر مامىر ايىندا 2،5 مىڭ قوڭىراۋ شالىنسا، ماۋسىم ايىندا تاۋلىگىنە 4 مىڭعا دەيىن قوڭىراۋ تۇسكەن. ءبىر بريگادانىڭ ورتاشا تاۋلىكتىك جۇكتەمەسى ەكى ەسەگە ءوسىپ، 19 شاقىرىمدى قۇراپ وتىر.