ءبىر اپتادان بەرى اۋرۋحانادا جاتقان اقىن مۇحتار شاحانوۆتىڭ جاعدايى ءالى دە وڭالا قويماعان. ونىڭ ورىنباسارى قۇديار ءبىلال الەۋمەتتىك جەلىدە اقىنعا ءتيىستى كوڭىل بولىنبەي جاتقانىن جازىپ، پرەزيدەنت قاسىم-جومارت توقايەۆقا اشىق حات جولدادى.
– الەۋمەتتىك جەلى بەتىندە حابارلانعانىنداي، قازاقتىڭ ءبىرتۋار دارا پەرزەنتى مۇحتار شاحانوۆ ءوزىڭىز الاڭداۋشىلىق تانىتىپ وتىرعان وكپە قابىنۋى اۋرۋىنا شالدىعىپ، الماتى قالاسىنداعى "قالقامان" اۋرۋحاناسىندا ەم قابىلداپ جاتىر. اۋىرعانىنا ءبىر جۇمادان استى. ەمدەۋ شارالارى ءالى كۇنگە دەيىن وڭ ناتيجە بەرە قويعان جوق. اۋرۋحانا اكىمشىلىگى م. شاحانوۆتى اۋرۋعا شالدىققان كوپ ادامنىڭ ءبىرى رەتىندە عانا قابىلداۋدا. ال م. شاحانوۆ، ءوزىڭىز بىلەتىندەي، كسرو كەزىنەن باستاپ تاۋەلسىزدىك الۋىمىز ءۇشىن قىزمەت ەتكەن ساناۋلى تۇلعانىڭ ءبىرى. راس، جوعارى بيلىك شەشىمدەرىنىڭ بارىنە بىردەي باس شۇلعي بەرمەيدى. ءبىراق ءسىزدىڭ ۇلتتىق ماسەلەلەرگە قاتىستى شەشىمدەرىڭىزدى جوعارى باعالايدى. ءوزىڭىز پرەزيدەنتتىككە سايلاۋعا تۇسكەن كەزىڭىزدە دە سىزگە اشىق تۇردە قولداۋ ءبىلدىرىپ، ۇلت زيالىلارىن ءسىزدىڭ توڭىرەگىڭىزدە جينالۋعا شاقىرعان بولاتىن. م. شاحانوۆ سول نيەتىنەن ءبىر ساتكە دە اينىعان جوق، – دەپ جازىلعان اشىق حاتتا.
ول اقىننىڭ ءبىر اپتادان بەرى ەلەۋسىز ەم قابىلداپ جاتقانىن جەتكىزدى.
– قۇرمەتتى قاسىم-جومارت كەمەل ۇلى! قازاق حالقى ەرەكشە قۇرمەتتەيتىن م.شاحانوۆتىڭ اۋرۋحانادا ءبىر اپتادان بەرى ەلەۋسىز ەم قابىلاپ جاتۋى، كوپشىلىككە ءارتۇرلى وي سالۋدا. ولاردا: "مەملەكەت قازاق ۇلتىنىڭ مارتەبەسىن، رۋحاني قۇندىلىقتارىن اسقاقتاتۋ تۇرعىسىندا بار ءومىرىن سارپ ەتكەن م. شاحانوۆ سياقتى ۇلتتىق تۇلعالار دەنساۋلىعىنا نەگە نازار اۋدارمايدى؟" دەگەن الاڭداۋشىلىق بار. مۇنداي حالىق الاڭداۋشىلىعىن ءوز مۇددەلەرىنە پايدالانعىسى كەلىپ جۇرگەن كۇشتەر دە از ەمەس. سوعان وراي سىزدەن م. شاحانوۆتىڭ دەنساۋلىعىنا مەملەكەتتىك تۇرعىدا نازار اۋدارۋىڭىزدى سۇرايمىز، – دەپ ءسوزىن تۇيىندەدى قۇديار ءبىلال.
