قازاقستاننىڭ دەنساۋلىق ساقتاۋ مينيسترلىگى وكپەسى قابىنىپ اۋىرىپ جاتقان ناۋقاستاردى كوروناۆيرۋس ەمەس، پنيەۆمونيا دەۋدەن تانباي وتىر. الايدا دۇنيەجۇزىلىك دەنساۋلىق ساقتاۋ ۇيىمى، قازاقستان جانە شەتەل عالىمدارى ەلدە جاپپاي تارالىپ جاتقان پنيەۆمونيا دەرتىنىڭ ءىس جۇزىندە كوروناۆيرۋس ەكەنىن مالىمدەدى.
قازاقستاندا سوڭعى رەسمي دەرەككە ساي، 56 455 ادامنان COVID-19 انىقتالعان. ونىڭ ىشىندە 32 500 ناۋقاس اۋرۋدان ايىعىپ شىقسا، 264 ادام ىندەتتەن كوز جۇمعان. بۇل كوروناۆيرۋس پاندەمياسى ەندى باستالعان شاقتا دەنساۋلىق ساقتاۋ مينيسترلىگى بولجاعان مەجەدەن 16 ەسەگە كوپ.
ال ەلدە پنيەۆمونيادان كوز جۇمعانداردىڭ سانى جاريالانبادى. دەنساۋلىق ساقتاۋ ءمينيسترى "ناقتى دەرەكتى حابارلايمىز" دەگەنىمەن، اقپارات ءالى شىققان جوق. تەك جىل باسىنان بەرى 6 ايدا اتالعان سىرقاتتان مەرت بولعاندار ستاتيستيكاسى ايتىلدى. الايدا ونىڭ ءوزى الا-قۇلا. ماسەلەن، 3 شىلدەدە قازاقستاننىڭ باس سانيتار دارىگەرى ايجان ەسماعامبەتوۆا ەلدە سوڭعى جارتى جىلدا پنيەۆمونيادان 1 772 ادام اجال قۇشقانىن مالىمدەگەن. ال دەنساۋلىق ساقتاۋ مينيستر الەكسەي سوي 9 شىلدەدە وتكەن بريفينگتە سوڭعى التى ايدا 1 172 ادامنىڭ پنيەۆمونيادان قايتىس بولعانىن ايتقان.
باس سانيتار ايجان ەسماعامبەتوۆانىڭ دەرەگىنشە، پنيەۆمونيادان كوز جۇمعاندار COVID-19-دان قازا تاپقانداردان 7 ەسەگە، مينيستر مالىمەتى بويىنشا پنيەۆمونيادان قايتىس بولعاندار كوروناۆيرۋس ولىمىنەن 5 ەسەگە ارتىق.
بۇل مالىمدەمەلەردەن كەيىن، رەسمي دەرەكتى نەگىزگە الىپ الدىمەن جۇڭگو، ارتىنشا باتىستىڭ ون شاقتى ءىرى باسپا ءسوز قۇرالى قازاقستاندا ءولىم كورسەتكىشى كوروناۆيرۋستان دا جوعارى وكپە اۋرۋى ياعني پنيەۆمونيا تاراپ جاتقانى تۋرالى جازدى.
كەيىن ۇلىبريتانيالىق Daily Mail باسىلىمى اعىلشىن جانە جۇڭگو مەديسينا ماماندارىنان سۇحبات الىپ، ماماندارىنىڭ "قازاقستاندا تارالىپ جاتقان پنيەۆمونيا ءىس جۇزىندە COVID-19" دەگەن قورىتىندىسىن جاريالاعان.
ال دۇنيەجۇزىلىك دەنساۋلىق ساقتاۋ ۇيىمى جۇما كۇنى قازاقستانداعى وكپە اۋرۋىن COVID-19 دەپ سانايتىنىن مالىمدەدى.
ددسۇ توتەنشە جاعداي باعدارلاماسىنىڭ جەتەكشىسى مايك راياننىڭ سوزىنشە، قازاقستانداعى COVID-19 قوزعالىسىنىڭ جوعارى تراەكتورياسى پنيەۆمونيانىڭ شىن مانىندە COVID-19-دىڭ انىقتالماعان جاعدايلارى ەكەنىن بىلدىرەدى.
بۇعان دەيىن قازاقستاندىق نەيروحيرۋرگ دارىگەر مىڭجىلقى بەردىقوجايەۆ "پنيەۆمونيادان قايتىس بولىپ جاتقان ادامداردىڭ 99 پايىزىنىڭ ولىمىنە كوروناۆيرۋس سەبەپ" ەكەنىن ءمالىم ەتكەن.
قامشى پورتالى وسى رەتتە دۇنيەجۇزىلىك دەنساۋلىق ساقتاۋ ۇيىمىنىڭ، قازاقستان جانە شەتەل عالىمدارىنىڭ مالىمدەمەلەرىن نەگىزگە الىپ، پرەزيدەنت قاسىم-جومارت توقايەۆ پەن دەنساۋلىق ساقتاۋ ءمينيسترى الەكسەي سويدى قازاقستانداعى پنيەۆمونيانى كوروناۆيرۋس دەپ تانۋعا شاقىرادى.
پىكىر قالدىرۋ