قازاقستان پرەزيدەنتى ق.توقايەۆ ەلدەگى ەپيدەميولوگيالىق جاعداي وڭالا باستاعانىن، دەسە دە ءالى دە شەكتەۋ شارالارى قاجەت ەكەنىن ايتىپ، مۇقتاج ازاماتتارعا 42500 تەڭگە تولەنەتىنىن ايتتى.
"ءقازىر جاعدايدىڭ رەتتەلە باستاعانىنىڭ العاشقى نىشاندارى بايقالادى. احۋالدى تولىق تۇراقتاندىرۋ ءۇشىن الداعى ەكى اپتانىڭ ماڭىزى زور. مۇقتاج جاندارعا ۇكىمەت شىلدە ايىنا 42،5 مىڭ تەڭگە تولەيدى." دەلىنگەن توقايەۆتىڭ twitter-دەگى جازباسىندا.
ازىرگە الەۋمەتتىك تولەم قالاي جانە ناقتى كىمگە بەرىلەتىنى حابارلانعان جوق.
سونداي-اق پرەزيدەنت ەلدەگى ەپيدەميولوگيالىق احۋالعا بايلانىستى كارانتين رەجيمى تاعى ەكى اپتاعا سوزىلىپ، شىلدەنىڭ سوڭىنا دەيىن جالعاساتىنىن ايتتى.
"ەرتەڭ ۇكىمەتتىك كوميسسيا شەشىم قابىلدايدى. ازاماتتارىمىز دەنساۋلىعىن ساقتاۋ ءۇشىن كارانتيننىڭ نەگىزگى تالابى ءوزىن-وزى وقشاۋلاۋ شاراسىن قاتاڭ ۇستانۋى قاجەت" دەپ اتاپ ءوتتى ول.
سوڭعى رەسمي دەرەككە ساي قازاقستاندا 59 899 ادامنان كوروناۆيرۋس انىقتالعان. ونىڭ 34190-ى ىندەتتەن ايىعىپ شىقسا، 25 334 ناۋقاس ەمدەلىپ جاتىر. 375 ادام كۆي-دان قايتىس بولعان.
پىكىر قالدىرۋ