تۇركىستان وبلىستىق تۋبەركۋلەزگە قارسى ديسپانسەرىنىڭ باس دارىگەرى بولات ساعىمبەكوۆ دارىگەرلەر وتكىزگەن اكسياعا قاتىستى پىكىر ءبىلدىردى.
– الەۋمەتتىك جەلىدە پرەزيدەنتىمىز جاريالاعان جالپىۇلتتىق ازا تۇتۋ كۇنى كوروناۆيرۋس قۇرباندارىن ەسكە الۋ بويىنشا ءبىزدىڭ ارىپتەستەرىمىزدىڭ كوشەدەگى ۇنسىزدىك اكسياسى كەڭىنەن تارالىپ جاتىر. بۇل ىس-ارەكەتتى سىنعا الىپ جاتقان كەيبىر ازاماتتارىمىز دا بار، - دەيدى ول.
ول شىمكەنت قالاسىندا ورنالاسقان تۇركىستان وبلىستىق تۋبەركۋلەزگە قارسى ديسپانسەرى ۇجىمىنىڭ اتىنان رەسمي تۇردە مالىمدەمەسىن جاسادى.
– اتالمىش شارا ۇلتتىق مەديسينالىق اسسوسياسياسىنىڭ ءتورايىمى سادىقوۆا ايجان بەگايدار قىزىنىڭ بارشا مەديسينا قىزمەتكەرلەرىنە تاستاعان ۇندەۋىن قولداۋ ماقساتىندا، سۇم ىندەتپەن كۇرەسىپ كوز جۇمعان بارشا ارىپتەستەرىمىزدىڭ رۋحىنا تاعزىم ەتۋ ءۇشىن جاساعان ءبىزدىڭ ورتاق شەشىمىمىز.
اتى جامان اۋرۋمەن ارپالىسىپ ورتامىزدان كەتكەن قانشاما ماماننان، ارىپتەس-دوستان، قىزمەتتەس-جولداستارىمىزدان ايىرىلدىق. كوز الدىمىزدان كەتسە دە، جۇرەگىمىزدە قالدى، - دەپ جازدى جەلىدەگى پاراقشاسىندا.
ول ءوز سوزىندە ازا تۇتۋ كۇنى مارقۇمداردىڭ رۋحىنا تاعزىم ەتۋ ارىپتەستىك پارىز سانايتىنىن اتاپ ءوتتى.
– ولاردىڭ ءاربىرى وسىنداي قۇرمەتكە لايىق دەپ سانايمىز.
ءوز كەزەگىمدە، بۇل شارانى ۇيىمداستىرۋعا جەرگىلىكتى اكىمدىكتىڭ دە، ورتالىق بيلىك ورىندارىنىڭ دا ەشقانداي قاتىسى جوق ەكەندىگىن جەتكىزەمىن، - دەپ ءسوزىن تۇيىندەدى بولات ساعىمبەكوۆ.
پىكىر قالدىرۋ