جوو-نىڭ اقىلى بولىمىندە وقيتىن ستۋدەنتتەرگە وقۋ اقىسىن ارزانداتۋدى مەكەمە ورنى ءوزى شەشەدى. بۇل تۋرالى بءىلىم جانە عىلىم ءمينيسترى اسحات ايماعامبەتوۆ ورتالىق كوممۋنيكاسيالار قىزمەتىندە وتكەن ونلاين-بريفينگتە ايتتى.
– جوعارى وقۋ ورىندارىنا اكادەميالىق جانە قارجىلىق دەربەستىك بەردىك. سوندىقتان وقۋ اقىسى قانشا بولاتىنى تۋرالى ماسەلەنى ءار ينستيتۋت، ءار ۋنيۆەرسيتەت، ءار اكادەميا ءوزى شەشەدى. قاشىقتان وقىتقاندا شىعىن از بولادى دەگەن تۇسىنىك بار. نەگىزىندە ولاي ەمەس، مىسالى وقۋ ورنىندا 5 كورپۋس بولسا، بەسەۋى دە جابىلمايدى. ونىڭ كوممۋنالدىق شىعىندارى، جۇمىس ىستەپ جاتقان وقىتۋشىلاردىڭ شىعىندارى بار، – دەدى مينيستر.
ايماعامبەتوۆ قىركۇيەك ايىندا ۋنيۆەرسيتەتتەر مەن كوللەدج ستۋدەنتتەرى قاشىقتان وقيتىنىن مالىمدەدى.
بۇعان دەيىن دەنساۋلىق ساقتاۋ ءمينيسترى الەكسەي سوي قىركۇيەكتەن باستاپ بارلىق مەكتەپتەردە وقۋشىلاردى قاشىقتان وقىتۋدى ۇسىنعان. ۇكىمەت باسشىسى اسقار مامين دەنساۋلىق ساقتاۋ مينيسترلىگىنىڭ ۇسىنىسىن قولداپ، وقۋشىلار ءبىرىنشى توقساندى قاشىقتان وقيتىنىن مالىمدەدى.
پىكىر قالدىرۋ