الەۋمەتتىك جەلىدە باتىس قازاقستان وبلىسىندا اۋىل ورتەنىپ جاتىر دەلىنگەن ۆيدەو تاراپ جاتىر. ءورت باتىس قازاقستان وبلىسى اقجايىق اۋدانى كولوۆەرتنوە اۋىلى ماڭىندا نايزاعاي ءتۇسۋى سالدارىنان شىققانى بەلگىلى بولدى.
جالىن سالدارىنان اۋىلداعى ەكى ءۇي مەن بىرنەشە اۋىل شارۋاشىلىعى نىسانى ورتەنىپ كەتكەن.
ۆيدەودان "توعايدان باستالدى. بۇكىل اۋىل تولىعىمەن ورتەندى. قۇجاتتاردى جيناپ جاتىرمىز" دەگەن اۋىل تۇرعىندارىنىڭ ءسوزىن ەستۋگە بولادى.
وبلىستىق توتەنشە جاعداي دەپارتامەنتىنىڭ مالىمەتىنشە، ءورت نايزاعاي ءتۇسۋىنىڭ سالدارىنان باستالعان. وقيعا 13 شىلدەدە بولعان. الدىمەن ورمان، ارتىنان قۇرعاق ءشوپ پەن بۇتا ورتەنگەن. اۋداندا ءورتتىڭ بىرنەشە وشاعى تىركەلدى. قىزىل جالىندى اۋىزدىقتاۋ ءۇشىن وقيعا ورنىنا اتىراۋدان "قازاۆياقۇتقارۋ" اق-نىڭ مي-884 تىكۇشاعى مەن ارنايى قۇرام جىبەرىلگەن. جالىندى 40 گرادۋستىق اپتاپ ىستىق پەن جەل ۋشىقتىرعان.
"شاعاتاي جانە اقسوعىم اۋىلدارىنىڭ ماڭىندا قۇرعاق ءشوپ پەن بۇتالار ورتەندى. 16.00-دە قاتتى جەلدىڭ سالدارىنان ءورت ورال وزەنى ارقىلى كولوۆەرتنوە اۋىلىنا تارادى. مۇندا وزەننىڭ ەنى شامامەن 100 مەتر.
قولدا بار دەرەك بويىنشا، 5 گەكتار جەر ورتەنگەن. سونداي-اق ەكى ءۇي مەن 4 اۋىل شارۋاشىلىعى نىسانى ورتەنىپ كەتتى. ەكى ءۇيدىڭ بىرەۋىندە عانا ادامدار تۇرعان. 42 تۇرعىن، 15 ءىرى قارا مال، 25 ۇساق مال جانە 30 قۇس ءقاۋىپسىز جەرگە كوشىرىلدى" دەلىنگەن وبلىستىق توتەنشە جاعداي دەپارتامەنتى تاراتقان حابارلامادا.
ءورتتى سوندىرۋگە 93 ادام مەن 11 تەحنيكا جۇمىلدىرىلدى. ءورت ءالى كۇنگە دەيىن ءسوندىرىلىپ جاتىر.
وكرۋگكە كەلگەن شىعىن كولەمىن انىقتاۋ ءۇشىن ارنايى كوميسسيا قۇرىلادى.
– مەنىڭ 30 جىل تۇرعان ءۇيىم قيرادى. ءورت جايىق وزەنىنىڭ ارعى بەتىنە تاراپ كەتتى. وندا ورمان ورتەندى. قازىرگى تاڭدا اۋىل تۇرعىندارىنا كومەك كورسەتىلىپ جاتىر، – دەيدى كولوۆەرتنوە اۋىلىنىڭ تۇرعىنى ۆاسيليي سوبوليەۆ.
