ورتالىق كوممۋنيكاسيالار قىزمەتىنىڭ باسپا ءسوز ءماسليحاتىندا كارانتين رەجيمىنە قالاي مونيتورينگ جۇرگىزىلىپ جاتقانى ايتىلدى. بۇل تۋرالى قازاقستان دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتوراعاسى تيمۋر سۇلتانعازييەۆ حابارلادى.

ونىڭ ايتۋىنشا، 6-14 شىلدە ارالىعىندا مونيتورينگتىك توپتار كارانتين ۋاقىتىندا جۇمىس ىستەپ تۇرعان 16 572 نىساندى تەكسەردى. 1617 نىساننىڭ زاڭ بۇزعانى انىقتالىپ، 564 نىسان كەمشىلىگىن تۇزەتكەنگە دەيىن قىزمەتىن ءوز ەركىمەن توقتاتتى. اكىمشىلىك بۇزۋشىلىق تۋرالى 225 حاتتاما تولتىرىلىپ، ايىپپۇل سالىنعان.

– ساۋدا نىساندارىندا، قوعامدىق تاماقتانۋ ورىندارىندا ەرەجەلەر ءجيى بۇزىلىپ جاتادى. اتاپ ايتقاندا ادامدار ماسكا كيمەيدى، الەۋمەتتىك قاشىقتىق ساقتالمايدى، تەرمومەتريا جۇرگىزىلمەيدى،–دەدى ول.

بۇعان مىسال، اقمولا وبلىسىندا 500 شارشى مەترلىك دۇكەن رۇقسات بەرىلمەسە دە جۇمىس ىستەگەن. دۇكەن يەسىنە زاڭ بۇزعانى ءۇشىن 638 940 تەڭگە مولشەرىندە ايىپپۇل سالىندى. سونداي-اق سەمەيدەگى "الەم" ساۋدا ءۇيى مەن "ۆوسحود" بازارىنىڭ يەلەرىنە  كارانتين ۋاقىتىندا جۇمىس ىستەگەنى ءۇشىن ايىپپۇل سالىنعان. قوستاناي وبلىسىنداعى ساۋدا نىساندارىنىڭ قىزمەتكەرلەرىندە ماسكا دا، قولعاپ تا، انتيسەپتيك تە بولماعان. الماتى مەيرامحانالارىندا 30 ادام قاتىسقان بانكەت پەن 100 ادام شاقىرىلعان ۇيلەنۋ تويى وتكەن. كارانتين رەجيمىنىڭ ەرەجەلەرىن بۇزعان ەكى مەكەمە يەسىنە دە ايىپپۇل سالىندى.