ستاتيستيكا بويىنشا 2020 جىلدىڭ 6 ايى مەن سوڭعى 4 جىلدا پنيەۆمونيامەن اۋىرعان جانە قايتىس بولعان ناۋقاستاردىڭ سانى تومەندەدى. اعىمداعى جىلى وڭىردە 4937 ادامدا پنيەۆمونيا تىركەلدى. ونىڭ ىشىندە 79 ادام قايتىس بولدى. سوعان قاراماستان سوڭعى ءتورت جىلدا پنيەۆمونيا بويىنشا ءولىم كورسەتكىشى 33% ازايدى.

دەنساۋلىق ساقتاۋ باسقارماسىنىڭ دەرەكتەرىنە سۇيەنسەك، شىعىس قازاقستاندا 2016 جىلدىڭ 6 ايىندا 5382 ادام پنيەۆمونياعا شالدىعىپ، ونىڭ ىشىندە 117ء-ى قايتىس بولعان. 2017 جىلى 6164 جاعداي تىركەلىپ، 101 ءولىم فاكتىسى تىركەلدى. 2018 جىلى بۇل كورسەتكىش تومەندەدى. 6138 ادامنان پنيەۆمونيا انىقتالىپ، 95 ناۋقاس قايتىس بولدى. وتكەن جىلدىڭ 6 ايىندپ 5991 ادام پنيەۆمونيادان جازىلىپ، ءولىم كورسەتكىشى 114ء-ى قۇرادى. بيىل 4937 ادام پنيەۆمونياعا شالدىعىپ، 79 ناۋقاس قايتىس بولدى.

الەمدىك پاندەمياعا بايلانىستى ەلىمىزدە كوۆيدتىك پنيەۆمونيامەن اۋىرعاندار سانى ارتتى. شىعىس قازاقستان وبلىسىنىڭ باس پۋلمونولوگى زاعريپا ابدييەۆانىڭ ايتۋىنشا، وبلىستاعى دارىگەرلەر پنيەۆمونيانى العاشقى ساتىسىندا انىقتاۋدا. وڭىردە 15 كت اپپاراتى، 60 رەنتگەن اپپاراتى بار. بۇل پنيەۆمونيانى العاشقى ساتىسىندا انىقتاپ، ناۋقاستارعا ەم جاساۋعا مۇمكىندىك بەرەدى. باكتەريالدى، ۆيرۋستىق، ساڭىراۋقۇلاقتىق پنيەۆمونيا تۇرلەرىن انىقتاۋعا بولادى.

مەديسينا قىزمەتكەرلەرى شىعىس قازاقستان وبلىسىنىڭ تۇرعىندارىن دۇربەلەڭگە سالىنباي، دەنساۋلىقتارىنا مۇقيات قاراۋعا شاقىرادى.

كومپيۋتەرلىك توموگرافيا اپپاراتتارى تاۋلىك بويى جۇمىس ىستەيدى. سونىڭ ارقاسىندا پنيەۆمونيانىڭ كەز كەلگەن ءتۇرىن انىقتاپ، ەم جاساۋعا مۇمكىندىك بەرەدى.

شقو اقپارات ورتالىعى