Cۋ – تىرشىلىك كوزى، ءومىردىڭ قۋاتى. حالقىمىز «سۋدىڭ دا سۇراۋى بار» دەپ، تازا اۋىزسۋدىڭ ادام ومىرىندە الار ورنىن، ماڭىزىن، قادىر-قاسيەتىن ايشىقتاپ كەتكەن.
تىرشىلىك ءنارى ادام بالاسىنىڭ ەڭ ءبىر قاجەتتىلىگى. حالىق ءۇشىن تازا اۋىز سۋ ماسەلەسىن شەشۋ، ونى قولجەتىمدى ەتۋ سەرگەك سەزىمنىڭ، پاراساتتى زەردەلىلىكتىڭ جەمىسى.
ادامزات بالاسىنا ءۇش الىپتى سىي ەتكەن ۇلىلار مەكەنى اباي اۋدانى بۇگىندە ەڭبەكقور جۇرتىنىڭ مەرەيىنىڭ، باسشىسىنىڭ ايرىقشا ىقىلاسىنىڭ ارقاسىندا ەرەكشە قارقىنمەن دامىپ، قانات جايىپ كوركەيىپ كەلەدى. اۋداننىڭ بۇگىنگى كەلبەتى كوڭىلىڭىدى ءسۇيسىندىرىپ، كوزىڭدى قۋانتپاي قويمايتىنى راس.
ادامزاتتىڭ ءبىرتۋارى ۇلى اقىن اباي قۇنانباي ۇلىنىڭ 175 جىلدىعى اياسىندا حالىق يگىلىگىنە اينالارلىق قىرۋار جوبالار ءوز جالعاسىن تابۋدا. اقىن مەرەيتويى قارساڭىندا اۋداننىڭ ءبىر جاڭارىپ، ءبىر جاسارىپ قالعاندىعىن ايتا كەتۋ ءلازىم. جاڭا نىساندار سالىنىپ، حالىق ءۇشىن بوس جۇمىس ورىندارى اشىلدى. جوبالاردىڭ ىشىندەگى ماڭىزدىسى، كوڭىل قۋانتارلىعى – اباي اۋدانى قاراۋىل اۋىلىنداعى سۋ قۇبىرىن قايتا جاڭعىرتۋ جوباسى.
جۇرتىنىڭ جىرتىعىنا جاماۋ، جەل جاعىنا قورعان بوپ جۇرگەن ەل تىلەگىن ارقالاعان ازامات، ايماق باسشىسى د.ك.احمەتوۆ اۋدان ورتالىعى قاراۋىل اۋىلىنا كەلگەن ساپارىندا حالىقتىڭ تىنىس-تىرشىلىگىن، حال-احۋالىن ءجىتى زەردەلەي وتىرىپ، ەلدىڭ ەڭ ءبىر سۇراۋلى، قاجەتتى ماسەلەلەرىن تامىرشىداي تاپ باسىپ جولعا قويعان بولاتىن. سونىڭ ىشىندە اۋىلىشىلىك سۋ قۇبىرلارى جۇيەسىنىڭ سوناۋ 1976 جىلى سالىنىپ، سول جىلداردان بەرى جاڭارتىلماي ەسكىلىگى جەتىپ، ابدەن توزۋعا اينالعانىن ءوز كوزىمەن كورىپ وسى باعىتتاعى جۇمىستاردى كۇن تارتىبىنە قويدى.
سودان بەرى اۋىل ىشىندە سۋ قۇبىرلارىن تارتۋ بويىنشا جۇمىس اقپان ايىندا باستالعان. مەردىگەر «ۆوستوكستروي گرۋپپ» ج ش س وزىنە ارتىلعان سەنىمدى اقتاۋ ماقساتىندا جانكەشتىلىك تانىتىپ، جۇمىستى قىزۋ قارقىنمەن جۇرگىزۋدە. اۋىل ءىشى تولىعىمەن سۋ قۇبىرلارى جۇيەسىن اۋىستىرۋ وشاعىنا اينالعان. «بىتەر ءىستىڭ باسىنا، جاقسى كەلەر قاسىنا» دەمەكشى، اۋدان تۇرعىندارىنىڭ ءومىر ساپاسىن ارتتىرۋ، الەۋمەتتىك جاعدايىن جاقسارتۋ ماقساتىندا جولعا قويىلعان جۇمىستاردىڭ بارىسى كوزىقاراقتى جۇرتشىلىقتىڭ كوڭىلىنەن شىعۋدا. سۋ ماسەلەسى قاي كەزدە دە وزەكتى. سوندىقتان دا سۋ قۇبىرلارىنىڭ تولىق جاڭعىرتىلۋىنا، تازا اۋىز سۋعا قول جەتۋىنە از قالعان اۋىل تۇرعىندارىنىڭ قۋانىشىندا شەك جوق.
بۇگىنگى كۇنى اۋىلىشىلىك 44 كم ماگيسترالدىق جەلىدەن 33 كم قۇبىر تارتىلىپ ءبىتتى. تۇرعىن ۇيلەرگە تارتىلاتىن 42 كم جەلىنىڭ 19 كم تارتۋ جۇمىستارى اياقتالعان. ەكىنشى ساتىداعى رەزەرۆۋاردىڭ، سۋ مۇناراسىنىڭ جۇمىستارى جۇرگىزىلۋدە. ۇلتتىڭ قامى، ساۋ ۇرپاقتىڭ بولاشاعىنا اينالعان سۋ قۇبىرلارىن جاڭعىرتۋ جۇمىستارى بيىلعى قازان ايىندا تولىق اياقتالادى دەپ كۇتىلۋدە.
اۋداننىڭ دامۋى، قانات جايۋى ءبارىمىزدى قىزىقتىرادى. ۇلى دالامىزدىڭ قاي تۇپكىرى بولسا دا وسىلاي گۇلدەنىپ، قارىشتاپ دامىپ، كوركەيە بەرسە ەكەن...
شقو اقپارات ورتالىعى
بۇگىنگى كۇنى اۋىلىشىلىك 44 كم ماگيسترالدىق جەلىدەن 33 كم قۇبىر تارتىلىپ ءبىتتى. تۇرعىن ۇيلەرگە تارتىلاتىن 42 كم جەلىنىڭ 19 كم تارتۋ جۇمىستارى اياقتالعان. ەكىنشى ساتىداعى رەزەرۆۋاردىڭ، سۋ مۇناراسىنىڭ جۇمىستارى جۇرگىزىلۋدە. ۇلتتىڭ قامى، ساۋ ۇرپاقتىڭ بولاشاعىنا اينالعان سۋ قۇبىرلارىن جاڭعىرتۋ جۇمىستارى بيىلعى قازان ايىندا تولىق اياقتالادى دەپ كۇتىلۋدە.
اۋداننىڭ دامۋى، قانات جايۋى ءبارىمىزدى قىزىقتىرادى. ۇلى دالامىزدىڭ قاي تۇپكىرى بولسا دا وسىلاي گۇلدەنىپ، قارىشتاپ دامىپ، كوركەيە بەرسە ەكەن...
شقو اقپارات ورتالىعى
پىكىر قالدىرۋ