قامشى پورتالى جاريالاعان "ۇكىمەت تاراتىلسا، قاي شەنەۋنىكتىڭ قىزمەتىندە قالعانىن قولدايسىز؟" ساۋالناماسىنىڭ قورىتىندىسى شىقتى.

ساۋالناماعا ءبىر جارىم تاۋلىك ىشىندە 75 148 قولدانۋشى قاتىستى. ساۋالناما قورىتىندىسى بويىنشا ءبىلىم جانە عىلىم ءمينيسترى اسحات ايماعامبەتوۆ داۋىس بەرگەندەردىڭ 78،5 پايىزىن جيناپ، رەيتينگتە ءبىرىنشى ورىن الدى. وعان 58 994 داۋىس بەرىلدى.

2-ورىنعا 5،4 پايىزبەن (4059 داۋىس) يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، 3-ورىنعا 3،1 پايىزبەن (2344) ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جايعاستى.

سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى مىندەتىن اتقارۋشى باعدات مۋسين 2،9 پايىزبەن (2157) 4-ورىن السا، دەنساۋلىق ساقتاۋ ءمينيسترى الەكسەي سوي 2،2 پايىزبەن (1659) بەستىكتى قورىتىندىلادى.

مينيسلەر كابينەتىن باسقارىپ وتىرعان اسقار مامين 0،5 پايىز (343) جيناسا، بەس شەندى – سىرتقى ىستەر ءمينيسترى مۇحتار تىلەۋبەردى، قورعانىس ءمينيسترى نۇرلان ەرمەكبايەۆ، ىشكى ىستەر ءمينيسترى ەرلان تۇرعىمبايەۆ، اۋىل شارۋاشىلىعى ءمينيسترى ساپارحان وماروۆ، قارجى ءمينيسترى ەرۇلان جاماۋبايەۆ ساۋالناما قاتىسۋشىلارىنىڭ 0.2 پايىز داۋىسىن الدى.

ايتا كەتەرلىگى، ساۋالناماعا قاتىستى قامشى رەداكسياسىنا ءتۇرلى قوڭىراۋلار ءتۇستى. ارتىنشا سايتقا حاكەرلىك شابۋىل جاسالىپ، پورتال جۇمىسىن ىستەن شىعارۋعا ارەكەت جاسالدى.

ءبىلىم جانە عىلىم ءمينيسترى اسحات ايماعامبەتوۆتى قولداپ، رەداكسيانىڭ تەلەفونىنا قوڭىراۋ شالعاندار، whatsapp نومەرىنە جازعاندار كوپ بولدى.

ايماعامبەتوۆتىڭ ساۋالناما باستالعاننان كوش باستاپ، داۋىستى تۇراقتى تۇردە جيناعانىن ايتا كەتكەن ءجون.

سونىمەن قاتار كەي مينيسترلەرگە داۋىس بەرۋشىلەر سانى كەنەتتەن ارتقانى بايقالدى.

بۇعان دەيىن پرەزيدەنت توقايەۆ 10 شىلدە كۇنى ۇكىمەتتىڭ كەڭەيتىلگەن وتىرىسىندا كوروناۆيرۋسقا قاتىستى احۋال جاقسارماسا، مينيسترلەر كابينەتىنىڭ وسى قۇرامدا جۇمىس ىستەۋ مۇمكىندىگى تۋرالى ماسەلە تۋىندايتىنىن ايتىپ، ۇكىمەتتىڭ وتستاۆكاعا كەتۋى ىقتيمال ەكەنىن مەڭزەگەن.

20 شىلدەدە اسقار جۇماعالييەۆ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى قىزمەتىنەن بوساتىلعاندا الەۋمەتتىك جەلىدە ۇكىمەت قۇرامىن وزگەرتۋ باستالعانى تۋرالى اڭگىمە شىقتى.

كەيبىر ساراپشىلار مينيسترلەر بىرتىندەپ اۋىستىرىلۋى مۇمكىن ەكەنىن ايتقان.

♦ وقي وتىرىڭىز: "كەتكەنى دۇرىس". ۇكىمەتتىڭ وتستاۆكاسى تۋرالى تۇرعىندار نە دەيدى؟