42 500 تەڭگە كولەمىندەگى الەۋمەتتىك تولەم 1 ملن 676 مىڭ قازاقستاندىققا اۋدارىلدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى حابارلادى.

"25 شىلدە ساعات 9.00-دەگى جاعداي بويىنشا شىلدە ايىندا شەكتەۋ شارالارىن ەنگىزۋگە بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان ەڭ تومەنگى جالاقى – 42 500 تەڭگە مولشەرىندە ءبىرجولعى تولەم تاعايىنداۋعا ازاماتتاردان 2،1 ملن-عا جۋىق بىرەگەي ءوتىنىش قابىلداندى. تولەم 1،7 ملن ادامعا تاعايىندالدى. اقشالاي قاراجات 1 ملن 676 مىڭ قازاقستاندىققا اۋدارىلدى" دەلىنگەن حابارلامادا.

ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا، تولەم الۋعا وتىنىمدەر بىرنەشە ارنالار ارقىلى قابىلدانادى.

2 ميلليوننان استام ءوتىنىمنىڭ ىشىندە:

– 804،4 مىڭ ادام پرواكتيۆتى فورماتتا تولەم تاعايىنداۋعا كەلىسىم بەردى؛

– 521،1 مىڭ ادام Egov.kz پورتالى جانە telegram-بوتتار ارقىلى؛

– 249،4 مىڭ ادام 42500.enbek.kz پورتالى ارقىلى؛

– 524،5 مىڭ ادام ەكىنشى دەڭگەيدەگى بانكتەردىڭ موبيلدىك قوسىمشالارى مەن ينتەرنەت-رەسۋرستارى ارقىلى ءوتىنىش بەرگەن.

ازاماتتاردىڭ ساناتتارى بولىنىسىندە:

– 804،4 مىڭ ءوتىنىش ءبىرىڭعاي جيىنتىق تولەم تولەۋشىلەردەن بەرىلدى (پرواكتيۆتى فورماتتا)؛

– 150،2 مىڭ ءوتىنىشتى جالدامالى قىزمەتكەرلەرى ءۇشىن جۇمىس بەرۋشىلەر بەردى؛

– 1 ملن 144 مىڭ ءوتىنىش ازاماتتاردىڭ باسقا ساناتتارىنان كەلىپ ءتۇستى (جەكە كاسىپكەرلەر؛ جەكە پراكتيكامەن اينالىساتىن ادامدار؛ ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالار).

ءوتىنىش قابىلداۋ 2020 جىلدىڭ 1 قىركۇيەگىنە دەيىن جالعاسادى.