ەلوردانىڭ №2 قالالىق كوپسالالى اۋرۋحاناسىنىڭ باس دارىگەرى يۆان يۆانوۆيچ لي قايتىس بولدى. بۇل تۋرالى اكىمدىكتىڭ باسپا ءسوز قىزمەتى حابارلادى.
يۆان يۆانوۆيچ 60 جاسىندا كوروناۆيرۋس ينفەكسياسىنان كوز جۇمدى.
"يۆان لي ءوز ءىسىنىڭ ناعىز مامانى بولاتىن. ول كوپتەگەن ادامداردىڭ ءومىرىن قۇتقارىپ قالدى. العاشقى كۇننەن باستاپ-اق كوروناۆيرۋسپەن كۇرەستە الدىڭعى شەپتە تۇردى. ونىڭ وتباسى مەن جاقىندارىنا كوڭىل ايتامىز" دەلىنگەن اكىمدىك تاراتقان حابارلامادا.
يۆان يۆانوۆيچ لي 1960 جىلى قاراعاندىدا دۇنيەگە كەلگەن. قاراعاندىمەملەكەتتىك مەديسينا ينستيتۋتىنىڭ حيرۋرگيا ماماندىعى بويىنشا بىتىرگەن.
3 جىل قاراعاندى وبلىسىنداعى جاستار اۋدانىنىڭ ورتالىق اۋرۋحاناسىندا حيرۋرگ، ودان كەيىن قاراعاندى قالاسىنىڭ جەدەل اۋرۋحاناسىندا ۋرولوگ بولىپ جۇمىس ىستەدى. 1996 جىلعا دەيىن الماتىداعى ورتالىق قالالىق كلينيكالىق اۋرۋحانانىڭ ۋرولوگيالىق ءبولىمىن باسقاردى.
سودان كەيىن ول قالاداعى ونكولوگيالىق ديسپانسەر مەن №1 كلينيكالىق اۋرۋحانادا باس دارىگەردىڭ ورىنباسارى جانە قازىرگى زامانعى مەديسينالىق تەحنولوگيالاردىڭ دياگنوستيكالىق ورتالىعىنىڭ باس دارىگەرى قىزمەتىندە بولدى.
2006 جىلى يۆان يۆانوۆيچ الماتىداعى №7 قالالىق كلينيكالىق اۋرۋحانانى باسقارىپ، كەيىننەن ەلورداعا اۋىستى.
2015 جىلى نۇر-سۇلتان دەنساۋلىق ساقتاۋ باسقارماسى باستىعىنىڭ ورىنباسارى، كەيىن №2 قالالىق كوپسالالى اۋرۋحانانىڭ ديرەكتورى بولدى.
بۇعان دەيىن ءقاۋىپتى ىندەتتەن قازاقستان قورعانىس ءمينيسترىنىڭ بۇرىنعى ورىنباسارى – امىربەك توگىسوۆ، قازاقستاننىڭ پرەزيدەنتتىگىنە ۇمىتكەر بولعان – جاقسىباي بازىلبايەۆ، اقتوبە قالاسىندا ينفەكسيالىق اۋرۋحانانىڭ باس دارىگەرى – قاليحان قوزباعاروۆ، الماتى وبلىسى اكىمىنىڭ ورىنباسارى – سەرىكجان بەسكەمپىروۆ، سونىمەن قاتار الماتى وبلىسىنىڭ باس مەملەكەتتىك سانيتار دارىگەرى – قايرات بايمۇحامبەت قايتىس بولعان.
پىكىر قالدىرۋ