الماتىدا دارىگەرلەر وكپەسى 96%-عا زاقىمدانعان ايەلدى امان الىپ قالدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.
الماتى ورتالىق قالالىق كلينيكالىق اۋرۋحاناسىنا كوروناۆيرۋس ينفەكسياسىنىڭ اۋىر تۇرىمەن، ەكى جاقتى پنيەۆمونيامەن 56 جاستاعى ايەل ءتۇستى.
وكپەنى كومپيۋتەر توموگرافياسىنا تۇسىرگەندە ەكى جاقتى 96%-عا پوليسەگمەنتتىك زاقىمدانعانى بايقالدى. وعان قوسا ەكىنشى دارەجەلى ارتەريالىق گيپەرتونيا اسقىنعان.
ناۋقاس دەرەۋ رەانيماسيا جانە قارقىندى تەراپيا بولىمىنە اۋىستىرىلدى. ورتالىق قالالىق كلينيكالىق اۋرۋحانانىڭ دارىگەرلەرى 10 كۇن بويى جانساقتاۋ بولىمىندە ناۋقاستىڭ ءومىرى ءۇشىن كۇرەستى.
كەيىن، ناۋقاستىڭ جاعدايى جاقسارۋىنا بايلانىستى بەيىندى بولىمگە اۋىستىرىلدى.
«ءقازىر پاسيەنتتىڭ جاعدايى جاقسى، ارنايى تەكسەرۋلەردەن كەيىن ۋچاسكەلىك دارىگەردىڭ باقىلاۋىندا بولادى»، - دەدى باس دارىگەردىڭ مىندەتىن اتقارۋشى گۇلنار قۇلقايەۆا.
«دارىگەرلەرگە، مەيىربيكەلەرگە جانە سانيتار ايەلدەرگە العىسىم شەكسىز. ولاردىڭ ماعان جاساعان بار ەڭبەگى، ءومىرىمدى قۇتقارعانى، ماعان ەكىنشى ءومىر سىيلاعانى ءۇشىن ۇلكەن راحمەت!»، – دەدى ناۋقاس ايەل.
پىكىر قالدىرۋ