الماتى ماڭىنداعى اۋداندارعا COVID-19 انىقتاۋعا ارنالعان 2 زەرتحانا اشىلادى. بۇل تۋرالى بۇگىن ونلاين بريفينگ بارىسىندا قالانىڭ باس سانيتارلىق دارىگەرى جانداربەك بەكشين ايتتى.

ونىڭ ايتۋىنشا، قالادا زەرتحانالىق جولدارمەن راستالعان 8259 ادامنىڭ 71،2 پايىزى عانا الماتىدا تىركەلگەن. قالعان 1404 ادام قالا ماڭىنداعى اۋدانداردا نەمەسە باسقا وڭىرلەردەن كەلگەن.

جاقىندا دارىگەرلەر، ەپيدەميولوگتار، زەرتحانا ماماندارىنان تۇراتىن ارنايى توپ الماتى اگلومەراسياسىنداعى 3 اۋداندى ارالاپ كوردى. قالالىق ماماندار وبلىس ماماندارىنا كەشەندى كەڭەس كورسەتتى.

«ارالاۋ كەزىندە الىس اۋدانداردا COVID-19 انىقتاۋعا ارنالعان زاماناۋي زەرتحانا تاپشى ەكەنىن بايقادىق. سوندىقتان، الماتىدان وبلىسقا 1 ستاسيونارلىق، 1 جىلجىمالى زەرتحانا بەرۋ تۋرالى شەشىم قابىلداندى. بايقاعانىمىزداي، الماتىعا تۇسكەن قوڭىراۋلاردىڭ 40 پايىزى الماتى وبلىسىنان كەلگەنى انىقتالدى. سوندىقتان، ەگەر ولارعا جەرگىلىكتى جەردە كاسىبي كومەك كورسەتىلسە، ولارعا الماتىعا كەلۋگە قاجەتتىلىك بولماس ەدى»، - دەدى جانداربەك بەكشين.

ستاسيونارلىق زەرتحانا قۋاتى تاۋلىگىنە 1000 تەست بولسا، جىلجىمالى زەرتحانالار تاۋلىگىنە 500 تەست بولماق.

«بۇل اۋداندا تۇرىپ جاتقان حالىققا ۇلكەن كومەك بولادى. شىعارىپ جاتقان زەرتحانالاردىڭ سىناما تاريفتەرى وتە تومەن. 11500 تگ اسپايدى. لابوراتوريالىق زەرتتەۋدىڭ قول جەتىمدى بولۋى ماڭىزدى دەپ ويلايمىن»، - دەدى ج.بەكشين.