الماتىدا COVID-19 اۋىر جاعدايدا ءوتىپ جاتقان ناۋقاستار سانى 30 پايىزعا ازايدى. بۇگىن ونلاين-بريفينگ بارىسىندا قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ بۇگىنگى تاڭدا جانساقتاۋ جانە قارقىندى تەراپيا بولىمىندەگى ناۋقاستارعا ەرەكشە كوڭىل بولىنەتىنىن ايتتى.

اتالعان باعىتتاعى جۇمىستاردى كۇشەيتۋ ءۇشىن قوعامدىق دەنساۋلىق ساقتاۋ باسقارماسىنىڭ جانىنان انەستەزيولوگيا جانە رەانيماتولوگيا ءموبيلدى ورتالىعى قۇرىلدى، وندا جان ساقتاۋ جانە قارقىندى تەراپيا ءبولىمىنىڭ ناۋقاستارىنا كەڭەس بەرىلەدى. اتالعان ورتالىقتا بىلىكتى مامانداردان تۇراتىن رەانيماتولوگتار توبى قىزمەت ەتەدى.

«تاۋلىك بويعى رەجيمدە رەانيماتولوگتاردىڭ ءموبيلدى بريگادالارى پاسيەنتتەرگە تەلەمەديسينا ارقىلى وقيعا ورنىندا كەڭەس بەرۋدى جۇزەگە اسىرادى. ناۋقاس تۋرالى بارلىق مالىمەتتەر ورتالىقتىڭ رەانيماتولوگ دارىگەرلەردەن، كافەدرالدى قىزمەتكەرلەردەن، سونىڭ ىشىندە زەينەتتەگى دارىگەرلەردەن قۇرالعان بىلىكتى ماماندارى بار ساراپتاۋ بولىمىنە بەرىلەدى»، — دەپ ءتۇسىندىرىپ ءوتتى كامالجان نادىروۆ.

اتالعان ورتالىقتىڭ جۇمىسىنىڭ ارقاسىندا اۋىر جاعدايداعى ناۋقاستار ساناتىنا قاتىستى وڭ وزگەرىس بايقالعان، جاعدايلارى جاقسارۋى ەسەبىنەن ولاردىڭ (اۋىر جاعدايداعى ناۋقاستار) سانى 30 پايىزعا تومەندەگەن.

بۇدان بولەك، ۇيدە ەمدەلىپ جاتقان ناۋقاستار ءۇشىن امبۋلاتورلىق دەڭگەيدە ۆيرتۋالدى ينفەكسيالىق اۋرۋحانا ۇيىمداستىرىلعان.

بارلىعى امبۋلاتورلىق دەڭگەيدە 2435 ناۋقاس مونيتورينگتىك باقىلاۋعا الىنعان. 72 ءموبيلدى بريگادا قىزمەت ەتۋدە. وسى ىسكە جۇمىلدىرىلعان ماماندار سانى 409 دارىگەردى قۇرايدى.

«بۇل مامانداردىڭ مىندەتى ناۋقاستاردىڭ ۇيلەرىنە بارىپ قىزمەت كورسەتۋ. ول ءۇشىن ولار قاجەتتى جەكە قورعانىس قۇرالدارىمەن قامتاماسىز ەتىلگەن. ينفەكسيالىق قاۋىپسىزدىككە ارنالعان ارنايى ترەنينگتەردەن وتكەن. سونىمەن بىرگە ولار پتر تالدامالارىن الادى جانە قاجەت بولعان جاعدايدا ەم تاعايىنداپ، ءتيىستى دارى-دارىمەكپەن قامتۋ ارقىلى ۇيدە ستاسيونار ۇيىمداستىرادى»، — دەپ قوستى ول ءوز سوزىنە.

تاۋەكەل (ءقاۋىپتى) توبىنا ەنگەن ناۋقاستارعا باقىلاۋدى كۇشەيتۋ ءۇشىن الماتى قالاسىنىڭ اكىمدىگى مەن س. د. اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتى بىرلەسىپ ناۋقاستاردى مونيتورينگتەۋ ورتالىعىن ىسكە قوستى.

مونيتورينگ ورتالىعى تاۋەكەل توپتاعى امبۋلاتورلى ناۋقاستارعا تاۋلىك بويى باقىلاۋ جۇرگىزۋگە ارنالعان.

«بۇگىندە اتالعان ورتالىقتىڭ ەمحانالىق قىزمەت جانە جەدەل مەديسينالىق كومەك قىزمەتىمەن ءوزارا بايلانىس جاساۋ الگوريتمى قارالۋدا. مۇنداي ءادىس اسقىنۋلار سانىن ازايتىپ، امبۋلاتورلىق دەڭگەيدە ءتيىمدى ەممەن قامتاماسىز ەتۋگە مۇمكىندىك بەرەدى»، — دەپ اتاپ ءوتتى ك.نادىروۆ.