الماتىنىڭ ناۋرىزباي اۋدانىنىڭ اكىمدىگى ماسكا رەجيمىن ساقتاماعانى ءۇشىن جەكە تۇلعالارعا ايىپپۇل سالۋدى باستادى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين بريفينگ بارىسىندا الماتىنىڭ ناۋرىزباي اۋدانى اكىمىنىڭ ورىنباسارى باعلان داندىبايەۆ حابارلادى.

قالا تۇرعىندارى اراسىندا اۋىرۋ جاعدايلارىن ازايتۋ ماقساتىندا بارلىق اۋدانداردىڭ اۋماقتارىندا ماسكا رەجيمى مەن الەۋمەتتىك قاشىقتىقتى ساقتاۋ ماڭىزدىلىعى تۋرالى كۇشەيتىلگەن ءاقپاراتتىق-تۇسىندىرۋ جۇمىستارى جۇرگىزىلۋدە.

قالادا ەپيدەميولوگيالىق جاعدايدىڭ ناشارلاۋىن بولدىرماۋ ءۇشىن قاتاڭ شەكتەۋ شارالارى قابىلدانعانى بەلگىلى، ولاردى بۇزعانى ءۇشىن اكىمشىلىك جاۋاپكەرشىلىك قاراستىرىلعان. وسىعان بايلانىستى الماتىدا كاسىپكەرلىك سۋبەكتىلەرى مەن قالا تۇرعىندارىنىڭ كارانتيندىك شارالارىن، سونىڭ ىشىندە ماسكا رەجيمىنە قاتىستى بۇزۋشىلىقتاردى انىقتاۋ بويىنشا مونيتورينگتىك توپتار جۇمىس ىستەيدى.

الماتىنىڭ ناۋرىزباي اۋدانى اكىمىنىڭ ورىنباسارى باعلان داندىبايەۆتىڭ ايتۋىنشا، اۋدان اۋماعىندا حالىق تاراپىنان ماسكا رەجيمىن بۇزۋشىلاردى انىقتاۋ بويىنشا جۇمىستار بەلسەندى جۇرگىزىلىپ جاتىر.

«بۇگىندە كارانتين رەجيمىن بۇزۋعا قاتىستى 41 اكىمشىلىك ماتەريال تولتىرىلدى. ونىڭ ىشىندە 24 جەكە تۇلعاعا ماسكا كيمەگەندەرى ءۇشىن جانە 14 كاسىپكەرلىك وبەكتىلەرىنە سانيتارلىق نورمالاردى ساقتاماعانى ءۇشىن. جابىق عيماراتتاردىڭ كىرەبەرىس ەسىكتەرى مەن كوشەلەرگە اقپاراتتىق ماتەريالدار ءىلىپ قويعانىمىزعا قاراماستان، ماسكا رەجيمىن بۇزاتىن ادامدار بار»، — دەدى باعلان داندىبايەۆ، سونداي-اق، ول ماسكا رەجيمىن بۇزعاندارى ءۇشىن تۇرعىنداردىڭ ايىپپۇل تولەي باستاعانىن اتاپ ءوتتى. جالپى، تۇرعىنداردىڭ كارانتين رەجيمىن ساقتاۋىن قامتاماسىز ەتۋ بويىنشا جۇرگىزىلىپ جاتقان جۇمىستارعا تۇسىنىستىكپەن قارايتىنى اتاپ ءوتىلدى.

جالپى ناۋرىزباي اۋدانىندا COVID-19-دىڭ الدىن الۋدا 2943 ارنايى اقپاراتتىق ماتەريالدار: ساياباقتاردا، سكۆەرلەردە، اۋلالاردا جانە جول قيىلىستارىندا، تقكو، ءدارىحانالاردا جانە اۆتوكولىك جۋۋ ورىندارىندا، سۋپەرماركەتتەردە، دۇكەندەردە جانە ايالدامالاردا، ەمحانالاردا، كوپقاباتتى تۇرعىن ۇيلەردە ورناتىلعان. جەكە اقپاراتتىق بۋكلەتتەردى ادامدار كوپ جينالاتىن ورىنداردا تاراتادى.