بۇگىن الماتى اۋەجايىنا دارى-دارمەكتەرى بار كەزەكتى بورت كەلىپ قوندى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

«ىڭكار» فاركومپانياسىنىڭ تاپسىرىسى بويىنشا ءۇندىستاننان جالپى سالماعى 32 توننا بولاتىن جۇك جەتكىزىلدى. كومپانيا وكىلدەرىنىڭ ايتۋىنشا، اۋەجايدا جالپى سانى 242 مىڭ قاپتاما بولاتىن COVID-19-عا قارسى پرەپارات تۇسىرىلگەن.

جۇك كەدەندىك راسىمدەۋدەن ءوتىپ، قاجەتتى قۇجاتتار تولتىرىلعاننان كەيىن كومپانيانىڭ قويماسىنان ءدارىحانا جەلىلەرىنە جەتكىزىلەدى.

كومپانيا سونىمەن بىرگە ارنايى تۇراقتاندىرۋ قورىنا دارى-دارمەكتەردى ساتىپ الۋ تەتىگىن ىسكە اسىرا باستاعانىن ايتتى.

ەسكە سالا كەتسەك، الماتى قالاسىنىڭ اكىمى ب. ساعىنتايەۆتىڭ تاپسىرماسىمەن فارماسيەۆتيكالىق كومپانيالارعا قاجەتتى دارى-دارمەكتەردى ساتىپ الۋ ءۇشىن پايىزسىز نەسيە بەرۋگە 5 ملرد تگ كولەمىندە قارجى بولىنگەن. قاراجاتتار قايتارىمدى جانە اينالمالى نەگىزدە «جۇمىس ىستەيدى».

شىلدە ايىنىڭ باسىندا كەيبىر ءدارىحانالاردا سۇرانىس جوعارى بولعاندىقتان، ىستىق تۇسىرەتىن جانە باسقا پرەپاراتتاردىڭ تاپشىلىعى تۋىنداعانى بەلگىلى. الايدا جەدەل قابىلدانعان شارالاردىڭ ارقاسىندا جاعداي تۇراقتاندى. سونىمەن قاتار، قالاداعى تۇراقتاندىرۋ قورىنان دارى-دارمەكتەردى الماتىداعى COVID-19-عا قارسى ستاسيونارلارعا جەتكىزۋ جۇمىستارى باستالدى.

بۇرىن حابارلانعانداي، شىلدە ايىنىڭ سوڭىنا دەيىن الماتىعا COVID-19-عا قارسى پرەپاراتتاردىڭ 6،5 ملن قاپتاماسى جەتكىزىلەدى.