الماتىنىڭ بارلىق كلينيكالارىندا وتتەگىنىڭ ورتالىقتان بەرىلۋىن جاساۋ كەرەك. بۇل تۋرالى «الماتى» تەلەارناسىنىڭ Akimat Live باعدارلاماسىنا قاتىسقان قالا اكىمى باقىتجان ساعىنتايەۆ حابارلادى.

ساپالى ەمگە اسەر ەتەتىن فاكتورلاردىڭ ءبىرى — ول ناۋقاستاردى مەديسينالىق وتتەگىمەن قامتاماسىز ەتۋ. وسىعان بايلانىستى، بۇل ماسەلەنى جۇيەلى تۇردە شەشۋ ءۇشىن مەديسينالىق ۇيىمدارعا وتتەگى ستانسيالارىن ورناتۋ بويىنشا قالالىق باعدارلاما قابىلداندى. وسىنىڭ ارقاسىندا ءبىرىنشى ەشەلونداعى جاتىن ورىنداردىڭ 100%-ى وتتەگىمەن قامتىلادى.

«ەگەر كلينيكالاردا قاجەتتى كولەمدە ستانسيا جۇمىسىن قامتاماسىز ەتە الاتىن ءوز وتتەگى ستانسياسى بولسا، وندا ول جۇيەنى رەتتەۋ كەرەك. ول ءۇشىن قارجى دا ءبولىندى. 10 قىركۇيەككە دەيىن اۋىر جاعدايداعى ناۋقاستارمەن جۇمىس ىستەيتىن ءبىرىنشى ەشەلونداعى 8 كلينيكا ورتالىقتاندىرىلعان وتتەگى بەرۋ جۇيەسىنىڭ ستاسيونارلارىمەن قامتاماسىز ەتىلەدى. ەكىنشى كەزەڭدە ءبىز ەكىنشى ەشەلونداعى كلينيكالاردى وتتەگىمەن قامتاماسىز ەتۋگە كوشەمىز، سول ارقىلى بۇل ماسەلەنى شەشەمىز»، — دەپ اتاپ ءوتتى اكىم.