الماتى اكىمى باقىتجان ساعىنتايەۆ دارىلەردى جەتكىزۋدەگى جاعدايدىڭ تۇراقتالعانىن حابارلادى.

دارىلىك پرەپاراتتارعا دەگەن سۇرانىستى تۇراقتاندىرۋ بويىنشا قالا اكىمدىگىمەن قولعا الىنعان شارالار قالا حالقىن دا، سونداي-اق، مەگاپوليستىڭ قالا ماڭىنداعى اۋداندارىن دا دارى-دارمەكپەن قامتاماسىز ەتۋگە مۇمكىندىك بەردى. 16 شىلدەدەن باستاپ بۇگىنگى كۇنگە دەيىن تۇراقتاندىرۋ قورىنىڭ رەزەرۆىنەن قالانىڭ ءدارىحانا جەلىلەرىنە 437 مىڭ قاپتامادان اساتىن دارىلىك پرەپاراتتاردى جەتكىزۋ جۇزەگە اسىرىلدى. سونىمەن بىرگە، تۇراقتاندىرۋ قورىنان بولىنگەن قارجى اياسىندا ءۇندىستاننان 3،8 ملن قاپتاما ءدارى جەتكىزىلدى. اتالعان كولەمدەگى دارىلەر قالانىڭ دارىلىك پرەپاراتتارعا دەگەن ءبىر ايلىق سۇرانىسىن جابۋعا مۇمكىندىك بەرەدى.

«ەڭ باستىسى – دۇرلىكپەنى باسىپ، قاجەتتى دارىلەردى بارلىق ءدارىحانا سورەلەرىنە دەيىن جەتكىزۋ قاجەت بولدى. ءقازىر ءبىز جاسالعان جۇمىستاردىڭ ناتيجەسىن كورىپ وتىرمىز. ءبىز اكىمدىك جانىنان جابدىقتاۋ توبىن قۇردىق جانە ول توپ ءقازىر تىكەلەي قولدارىمەن وندىرۋشىدەن ءبىزدىڭ ءدارىحانالاردىڭ سورەلەرىنە دەيىن جولداپ وتىرادى»، — دەپ اتاپ ءوتتى اكىم.

ب. ساعىنتايەۆ باستاپقىدا دارىلەرمەن قامتاماسىز ەتۋگە 105 جۇيە قۇرۋشى ءىرى ءدارىحانالار الىنعانىن اتاپ ءوتتى. ءقازىر مۇنداي ءدارىحانالار سانى 385-كە جەتكەن. بۇل ءتىزىم بىرتىندەپ ۇلعاتىلىپ وتىرادى.

«ماسەلەن، ەگەر مامىر ايىندا 50 مىڭ قاپتاما پاراسەتامول ساتىلسا، شىلدەنىڭ 3 اپتاسىندا ميلليون قاپتاما ساتىلىپ كەتكەن – سۇرانىس وسىنداي بولعان»، — دەدى اكىم، بۇگىندە جاعداي تۇراقتالعان.

سەرتيفيكاتتاۋ جانە كەدەندىك اكىمشىلىكتەندىرۋ پروسەدۋرالارىن جەڭىلدەتۋ تۋرالى شەشىم قابىلدانعان. ۇكىمەتپەن اتالعان شارالار قابىلدانىپ، سونىڭ ارقاسىندا قالاعا مەديكامەنتتەردى جەدەل جەتكىزۋ قامتاماسىز ەتىلدى.

«ءبىز دارىلەردى ءبىر رەتتىك ەنگىزۋ ءۇشىن – قۇجاتتار راسىمدەۋىن ءبىر كۇندە جاساۋ ءۇشىن فارماسيەۆتيكالىق يندۋستريا قاۋىمداستىعىمەن بيلىككە ۇسىنىس جاسادىق، بۇرىن قۇجاتتار 2 اپتا كولەمىندە ازىرلەنەتىن. وسىنداي توسقاۋىلدار كوپ بولدى. ولار دا بەلگىلى ءبىر ۋاقىت الدى. كەدەندىك تازارتۋ پروسەسى دە تەز وتەدى، ەشقانداي ماسەلە جوق»، — دەپ تولىقتىردى ول.