الماتى قالاسى پوليسيا دەپارتامەنتى تۇركسىب اۋداندىق پوليسيا باسقارماسىنىڭ جەدەل ۋاكىلى پوليسيا مايورى باقىتجان باكىروۆتىڭ قىلمىسكەردىڭ ارتىنان 13ء-شى قاباتتان سەكىرىپ كەتىپ، امان قالۋى بۇگىنگى كۇننىڭ ەڭ ءقاۋىپتى وقيعاسى. بۇل تۋرالى الماتى-اقشامى جازدى.
11 شىلدە كۇنى بەلگىسىز ادامنىڭ تۇركسىب اۋدانىنا قاراستى اۋماقتا ءۇي توناپ، ءۇي يەسىنىڭ 17 000 اقش دوللارىن قولدى ەتكەنى ازداي، سول ءۇيدىڭ 15 جاستاعى قىز بالاسىن زورلاپ كەتكەنى تۋرالى حاباردىڭ ىزىنە تۇسكەن الماتى قالاسىنىڭ جەدەل ۋاكىلدەرى كۇدىكتىنىڭ ءال-فارابي داڭعىلىنداعى كوپقاباتتى ۇيدەن پاتەر جالداپ، تىعىلىپ جاتقانىن انىقتايدى. ولارعا 13-قاباتتاعى پاتەرگە سانتەحنيك كەيپىندە كىرۋلەرىنە الدىمەن پاتەردىڭ يەسى كومەكتەسكەن. ول وزىندەگى ارتىق كىلتپەن ەسىكتى اشىپ، كۇدىكتىگە «قۇبىردان سۋ اعىپ جاتقانىن، سول ءۇشىن سانتەحنيك كەلگەنىن» ايتىپ، ىشكە ەنگەن. كۇدىكتى باقىتجان باكىروۆ پەن مەيىر نەسىپبايدى كورىپ، ءوزىنىڭ قولعا تۇسەتىنىن سەزىنگەن ساتتە كەلەسى بولمەنىڭ تەرەزەسىنەن سەكىرىپ كەتكەن. ساناسىندا تەك قىلمىسكەردى قايتكەندە دە ۇستاۋ كەرەك دەگەن وي اتوي سالعان باقىتجان دا ونىڭ سوڭىن الا سەكىرگەن. ءبىراق «قىرىق جىل قىرعىن بولسا دا اجالدى عانا ولەدى» دەگەندەي، قاشقان ەر ادام دا، جەدەل ۋاكىل باقىتجان دا استىڭعى 11-قاباتتىڭ تەرراساسىنا تۇسكەن.
«ءبارى قاس-قاعىم ساتتە بولدى. ەندى قولعا تۇسەيىن دەپ تۇرعان قىلمىسكەر تەرەزەدەن سەكىرىپ كەتكەندە، مەندە تەك «ونى قۇتقارماۋ كەرەك» دەگەن وي بولدى. سول ويمەن ونىڭ ارتىنان قالاي سەكىرىپ كەتكەنىمدى بىلمەيمىن. تاعى ەكى قابات تومەن پاتەردىڭ تەرراساسىنا ەكەۋمىز قاباتتاسا قۇلادىق. ول كەلەسى تەرراسساعا سەكىرمەك بولعاندا، مەن جەرگە ۇرىپ قۇلاتتىم دا، ارتىمنان كومەك جەتكەنشە ۇستاپ وتىردىم». باقىتجاننىڭ اڭگىمەسى كەيىپكەرلەرى ءبىرىن ءبىرى قۋىپ، شاتىردان شاتىرعا سەكىرەتىن كەيىپكەرلەرى بار بويەۆيك كينونى ەلەستەتەدى كوز الدىڭىزعا. اسىرەسە، 13- قاباتتىڭ تەرەزەسىنەن سەكىرۋگە باتىلدىق تانىتۋ اجالدىڭ اۋزىنا سەكىرۋمەن بىردەي ەكەنىن ويلاعاندا ەت پەن تەرىنىڭ اراسىنان قۇمىرسقا ءجۇرىپ وتكەندەي تىتىركەنەسىز. 13ء-شى قاباتتان جەرگە ەمەس، تومەنگى قاباتتىڭ تەرراساسىنا تۇسۋگە بولاتىنىن قىلمىسكەر بىلگەنمەن، باقىتجان بىلمەگەن.
«تەك قاشقىندى قولعا ءتۇسىرىپ، ۇستاپ وتىرعاندا عانا كوز الدىما ءالى بۋىندارى قاتپاعان التى بالام ەلەستەدى. قۇداي ساقتادى… ەگەر مەن مەرت بولسام ولاردىڭ بولاشاعى نە بولار ەدى؟ ەكى اي بۇرىن عانا دۇنيە ەسىگىن اشقان ەگىز بالام نە بولار ەدى؟» دەگەن ويلار ميىمدى جاۋلاپ الدى. ال سەكىرەر كەزدە بار ماقساتىم – قىلمىسكەردەن ايىرىلىپ قالماۋ بولدى. ويتكەنى، ونىڭ ءبۇلدىرشىن قىزعا جاساعان زورلىعىن ەستىگەندە، جاۋىزدى جازاسىز قالدىرماۋعا سەرت بەرگەم». كوزسىز ەرلىككە بارعان باقىتجان وكشە سۇيەكتەرىنىڭ سىنعانىن دا ەت قىزۋىمەن ەلەمەگەن. ءقازىر ونىڭ اياعىنا ءۇش رەت اۋىر وتا جاسالدى.
جەدەل ۋاكىلدەردىڭ ءومىرى ءقاۋىپ پەن قاتەردىڭ وتىندە. الىپ قالا الماتىداعى نەبىر قىلمىستىق وقيعالاردىڭ ورتاسىندا جۇرەتىن جەدەل ۋاكىلدەر ءسات سايىن اجالمەن بەتپە-بەت كەلەدى. قارۋلى قىلمىسكەردى ۇستاۋ، قاشقىننىڭ سوڭىنان قۋۋ، كۇدىكتىنىڭ جاسىرىنعان جەرىن ءدوپ باسۋ ولاردىڭ كۇندەلىكتى ءىسى. بۇل وقيعا باقىتجاننىڭ بۇگىنگە دەيىنگى ومىرىندەگى ەڭ ءقاۋىپتى وقيعا شىعار. وسىنىڭ ءبارىن وي ەلەگىنەن وتكىزىپ تۇرىپ، ونىڭ وسى ءبىر ءقاۋىپتى قىزمەتكە قالاي كەلگەنىن قايتا-قايتا سۇراعىشتاپ ارەڭ بىلدىك. سوزگە كەلگەندە سۋ جورعاداي تايپالا المايتىنى باقىتجاننىڭ بار بولمىسىنان ءبىلىنىپ تۇر. سوندا دا بولسا ءبىراز سىردى سۋىرتپاقتادىق.
وڭتۇستىك قازاقستان وبلىسىنىڭ جەتىساي قالاسىندا تۋىپ-وسكەن باقىتجان ءبىر ءۇيدىڭ تۇڭعىششى ەكەن. اكەسى ءانۋار ۇزاق جىل شىمكەنتتەگى ماقتا زاۆودىندا ىستەدى. «ءبىزدىڭ تاربيەمىزبەن نەگىزىنەن انامىز اينالىستى. وڭتۇستىكتە بىلەسىز عوي، ەس بىلگەن بالا قاراپ جۇرمەيدى. ماقتا تەرىمى، باۋ-باقشا كۇتىمىنە بالا كەزدەن ارالاسامىز. سوندىقتان شىعار، ەڭبەكتىڭ ءقادىرىن ءبىلىپ وستىك. اباي اتىنداعى ۇلتتىق ۋنيۆەرسيتەتتىڭ زاڭ فاكۋلتەتىن بىتىرگەن سوڭ، ماماندىعىم بويىنشا جۇمىسقا ورنالاسا الماي ءبىراز ءجۇردىم. ءبىراق قاراپ جۇرگەنىم جوق. قولىمنان قانداي جۇمىس كەلەدى، ءبارىن ىستەدىم. قۇرىلىستا دا ىستەدىم. 2006 جىلى الماتى قالاسى پوليسيا دەپارتامەنتى كريمينالدىق پوليسيا باسقارماسىنىڭ جەدەل ۋاكىلى قىزمەتىنە ىشكى ىستەر ورگاندارىنا قابىلداۋ ءتارتىبىنىڭ بارلىق تالابىن ورىنداپ، كونكۋرستان ءوتىپ بارىپ ورنالاستىم. سودان بەرى وسى قىزمەتتىڭ جالىن ۇستاپ ءجۇرمىن. قىزمەت بارىسىندا نەبىر كۇردەلى وپەراسيالاردى ورىنداۋعا تۋرا كەلەدى. وسى جولعى ارەكەتىمدى مەن ەرلىك دەپ باعالامايمىن، قىلمىسكەردى ۇستاۋ – مەنىڭ مىندەتىم»، – دەيدى باقىتجان انۋاربەك ۇلى.
وسى مىندەتىن ورىنداۋدا باتىلدىق تانىتىپ، اۋىر قىلمىس جاساپ قاشىپ جۇرگەن كۇدىكتىنى ۇستاعانى ءۇشىن پوليسيا مايورى باقىتجان باكىروۆ پەن پوليسيا اعا لەيتەنانتى مەيىر نەسىپباي قازاقستان رەسپۋبليكاسىنىڭ ىشكى ىستەر ءمينيسترى ە.تۇرعىمبايەۆتىڭ بۇيرىعىمەن «قۇقىقتىق ءتارتىپتى قامتاماسىز ەتۋگە قوسقان ۇلەسى ءۇشىن» مەدالىمەن ماراپاتتالعان بولاتىن.
ال جۋىردا باقىتجان انۋاربەك ۇلى باكىروۆ قازاقستان پرەزيدەنتى قاسىم-جومارت توقايەۆتىڭ جارلىعىمەن ەكىنشى دارەجەلى «ايبىن» وردەنىمەن ماراپاتتالدى. قۇتتىقتايمىز!
پىكىر قالدىرۋ