نۇر-سۇلتان قالاسىنىڭ اكىمى التاي كولگىنوۆ ەلورداداعى دەنساۋلىق ساقتاۋ ۇيىمدارىنا تۇسكەن سالماق ەداۋىر ازايعانىن ءمالىم ەتتى.

– قازىرگى كۇنى قالادا كوروناۆيرۋس ينفەكسياسىن جۇقتىرعاندار سانى – 10 320 ادام. جالپى 7260 ادام نەمەسە 70%ء-ى جازىلىپ شىقتى. ال سوڭعى ءبىر اپتا ىشىندە ولاردىڭ سانى 1563ء-تى قۇرادى. ياعني ناۋقاستاردىڭ شامامەن 25%ء-ى وتكەن اپتادا ساۋىقتى. 225 ازامات قايتىس بولدى. 1511 ادام ستاسيونارلاردا ەم الىپ جاتىر. اۋىر حالدەگى ناۋقاستار سانى 54،3%-كە ازايدى، – دەدى التاي كولگىنوۆ ۇكىمەت وتىرىسىندا.

ونىڭ ايتۋىنشا پرەزيدەنتتىڭ تاپسىرماسىنا سايكەس، ۇكىمەتتىڭ قولداۋىمەن ءبىرقاتار شارا قابىلدانعان. وسىنىڭ ناتيجەسىندە كارانتين ەنگىزىلگەن ساتتەن باستاپ كۆي بويىنشا جاعدايدىڭ ناقتى تۇراقتانۋى بايقالادى.

التاي كولگىنوۆ دەنساۋلىق ساقتاۋ ۇيىمدارىنا تۇسكەن سالماق ەداۋىر ازايعانىن اتاپ ءوتتى. اتاپ ايتقاندا:

– جەدەل جاردەمگە جۇگىنۋ سانى تاۋلىگىنە 4300-دەن 1600-گە دەيىن، ياعني 3 ەسەگە تومەندەدى؛

– كۆي بويىنشا جەدەل جاردەمگە جۇگىنۋ 500-دەن 89-عا دەيىن، ياعني 6 ەسەگە ازايدى؛

– جالپى شاقىرۋلار سانى تاۋلىگىنە 3 مىڭنان 1000-عا دەيىن، نەمەسە 3 ەسەگە تومەندەدى؛

– پنيەۆمونيامەن جاتقان ازاماتتار سانى 2 ەسەگە ازايدى (1348 دەن – 633 عا دەيىن)؛

– ستاسيونارلاردىڭ جۇكتەمەسى 99%-تەن 38%-كە دەيىن تومەندەدى؛

– ەگەر بۇرىن تاۋلىگىنە اۋرۋحاناعا 500-گە جۋىق پاسيەنت تۇسەتىن بولسا، ءقازىر 90-عا دەيىن ازايدى.

دەرەككوز: قازاقپارات