قازاقستاندا بالا زورلاۋ وقيعالارى نەگە جيىلەپ كەتتى؟ اتا-انا ءوز بالاسىن جىنىستىق زورلىق-زومبىلىقتان قورعاۋ ءۇشىن قالاي تاربيەلەۋ قاجەت؟ پسيحواناليز ينستيتۋتىنىڭ ديرەكتورى اننا قۇدياروۆا قامشى تىلشىسىنە بەرگەن سۇحباتتا وسى جانە باسقا دا ماسەلەلەرگە قاتىستى كەڭەسىمەن ءبولىستى.
– اننا مەرگەنباي قىزى، پەدوفيليا ماسەلەسى قازىرگى قوعامدا اشىق تالقىلانىپ ءجۇر مە؟
– قازىرگى قوعامدا پەدوفيليا ماسەلەسى تۋرالى ايتۋ ماڭىزدى. بولعان جايتقا كوز جۇمىپ، ايدان انىق نارسەنى مويىنداماۋ، ءوزىنىڭ وتباسىندا نەمەسە ۇيىنەن بىرنەشە قادام جەردەگى وسىنداي جاعدايلاردى ادامداردىڭ "كورمەۋى" ءقاۋىپ توندىرەدى. كونسەرۆاتيۆتى ويلايتىن ادامداردىڭ ءبىر بولىگى ءۇشىن مۇنداي قۇبىلىس، ءتىپتى، جوق سياقتى دا. ال مەن، مەنىڭ كابينەتىمدە كليەنتتەر وسى تۋرالى اڭگىمەنى ءجيى ايتاتىندىقتان، بۇل قۇبىلىستىڭ بار ەكەنىن جاقسى بىلەمىن.
– ءدال وسىنداي جاعدايمەن ءسىزدىڭ قىزمەتىڭىزگە جۇگىنەتىندەر كوپ پە؟
– ماعان كەلەتىن كليەنتتەردىڭ باسىم بولىگى – قازاقتار. قازاق اۋىلىندا وسكەندەر. جاقىندا كەلگەن ءبىر كليەنتىم ماعان وزىنەن ۇلكەن بىرگە تۋعان اعالارى بىرنەشە جىل بويى جىنىستىق قاتىناسقا تۇسۋگە ماجبۇرلەگەنىن ايتتى. ولار سول ءۇشىن وعان اقشا، شوكولاد، بالمۇزداق الىپ بەرگەن. اعالارى وعان "بىلەسىڭ بە، سەن بۇل نارسەگە ۇيرەنۋىڭ كەرەك. ويتكەنى سەن كۇيەۋگە شىققان سوڭ، بۇل نارسەمەن كۇندەلىكتى اينالىساتىن بولاسىڭ" دەپ ايتىپ وتىرعان. مەن كليەنتىمنەن "سەن، سوندا، اكەڭە نەمەسە اناڭا بارىپ ايتپادىڭ با؟" دەپ سۇراعانىمدا، ول "مەن بارلىق وتباسىندا اعالارى مەن قارىنداستارى وسىلاي جاسايدى دەپ ويلايتىنمىن" دەپ جاۋاپ بەردى. اعالارى وعان وسىنداي تاربيە كورسەتكەن. باسقا ءبىر وتباسىندا اكەسى ءوز بالالارىن زورلايتىن، سوندىقتان بالالارى دا "بارلىق اكەلەر وسىلاي ىستەيدى" دەپ ويلاعان.
– اتا-انا تاراپىنان نازاردىڭ جەتىسپەۋىنەن بالا پەدوفيل قۇربانىنا اينالۋى مۇمكىن بە؟
– پەدوفيلدەر – اگرەسسيۆتى ەمەس ادامدار. پەدوفيلدەر بالالارعا جەتىسپەيتىن نارسەلەردىڭ ورنىن تولتىرۋعا تىرىسادى. ول – ەڭ الدىمەن، اكەسى مەن اناسى تاراپىنان نازاردىڭ جەتىسپەۋى. مەن بارلىق اتا-انالاردى ايىپتاي المايمىن، ويتكەنى ولاردىڭ قولدارى بوس بولماۋى مۇمكىن. ءبىراق ادامنىڭ، بالانىڭ جانىن ۇمىتپاۋى قاجەت. ءوز بالاڭدى پەدوفيلدىڭ قۇربانى بولىپ كەتپەيتىندەي ەتىپ تاربيەلەۋ كەرەك. ەگەر جۇمىسباستى بولىپ جاتساڭىز، ەڭ بولماعاندا، ەكى-ۇش اپتادا ءبىر رەت بالاڭىزدان "ماعان ەشتەڭە ايتقىڭ كەلمەي مە؟ وسى ءۇش اپتا ىشىندە مەن سەنى رەنجىتكەن جوقپىن با؟" دەپ سۇراپ قويىڭىزشى. ەگەر بالاڭىز، مىسالى، "ءيا، اناشىم، سەن مەنى جەكسەنبى كۇنى قالاعان جەرىمە الىپ بارمادىڭ" دەپ بۇرتيسا، وعان قۋانىڭىز. ويتكەنى بۇل، بالانىڭ سىزگە سەنەتىنىنىڭ دالەلى، پەدوفيل قانداي زاتتار كورسەتىپ، قىزىقتىرماسىن، بالانىڭ ونىڭ ارتىنان ەرىپ كەتىپ قالمايتىنىنىڭ كەپىلى. سەبەبى وعان كەرەك بار نارسەنى اتا-اناسى بەرەدى. ال ەگەر بالاڭىز كوزىڭىزگە تىك قاراماي تۇرسا، وندا بۇل ارالارىڭىزدا ءبىر نارسەنىڭ دۇرىس ەمەس ەكەنىن بىلدىرەدى.
– بالانى جىنىستىق تۇرعىدا قالاي دۇرىس تاربيەلەۋ كەرەك؟
– جىنىستىق جاققا قىزىعۋشىلىق، اسىرەسە، 3 جاستان 5 جاسقا دەيىنگى بالالاردا جانە ارى قاراي، ءجاسوسپىرىم كەزىندە ەرەكشە ارتا تۇسەدى. بۇل كەزدە، بۇيرەك ءۇستى بەزىنىڭ بەلسەندىلىگىنە بايلانىستى گورمونالدى پروسەستەر قارقىندى جۇرەدى. سوندىقتان دا اتا-انالار وسى جاستاعى بالالارىنا نازار اۋدارعانى ءجون. ولارعا جىنىستىق ەنەرگيانى سۋبليماسيالاۋعا كومەكتەسكەنى وتە ماڭىزدى. وسىندايدا بالا ەرمەكسازبەن اينالىسىپ، ۇيىرمەگە، سەكسياعا قاتىسىپ، سۋبليماسياعا ءتۇسۋى كەرەك. ەگەر اتا-انا بالا ءۇشىن ماڭىزدى ۋاقىتتى وتكىزىپ السا، بالا "تۇيىق" بولىپ كەتۋى مۇمكىن. بۇل كەيىنىرەك گوموسەكسۋاليزمگە، پەدوفيلياعا بەيىمدىلىكتەن بايقالادى.
– بالاعا زورلىق جاسالعان جاعدايدا اتا-انا نە ىستەۋى قاجەت؟
– ەڭ باستىسى – ەشكىمگە كىنا ارتپاۋ كەرەك. وكىنىشكە وراي، مەنىڭ تاجىريبەمدە مۇنداي جاعدايلار وتە ءجيى كەزدەسەدى. بالانىڭ ەرەسەك ادام ەمەس ەكەنىن ءتۇسىنىڭىز. ەڭ الدىمەن، وعان نيەت ءبىلدىرىپ، قانداي جاعداي بولماسىن، ۇرىپ-سوقپايتىنىڭىزعا بالا سەنىمدى بولۋى قاجەت. بۇل – بالانىڭ كىناسى ەمەس، قايعىسى. زورلىق كورسەتككەن ادامدى مىندەتتى تۇردە جاۋاپكەرشىلىككە تارتۋ كەرەك. سول كەزدە عانا بالا ءوزىن قورعايتىن ادامداردىڭ بار ەكەنىن تۇسىنەدى. سونىمەن قاتار، جاعدايدى قۇپيا ۇستاۋ دا اسا ماڭىزدى. بالانىڭ اتى، ءجۇزى، قانداي جاعداي بولماسىن، ەشقانداي جەردە شىقپاۋعا ءتيىس. ويتكەنى ونىڭ ءومىرى ءالى الدا.
اتا-انالارعا ايتارىم، ءوز بالالارىڭىزعا مۇقيات بولىڭىزدار! ولارمەن جاقىن جانە سەنىمدى قارىم-قاتىناس ورناتىڭىزدار. ەگەر اتا-انا بالانىڭ بويىنان كۇدىك تۋدىراتىنداي بەلگىلەردى بايقاسا، وندا ونى مىندەتتى تۇردە پسيحولوگقا اپارعانى ءجون.
پىكىر قالدىرۋ