"قامشى" پورتالىنا قاراعاندى وبلىسى بۇقار جىراۋ اۋدانى بايقادام اۋىلىنىڭ ەدىگە رادولدا ەسىمدى تۇرعىنى اۋىلدارىندا ۇيالى بايلانىس پەن ينتەرنەت مۇلدە جوق ەكەنىن، سونىڭ سالدارىنان ونلاين وقۋعا دايىن ەمەستىگىن جازىپ حات جولدادى. سوزىنشە، پاندەميا باستالعان كەزدە اۋىلداعى وقۋشىلار مەن ستۋدەنتتەر ينتەرنەتتىڭ جوقتىعىنان قاتتى زارداپ شەككەن. وقىرمان ماسەلەنى قاعازعا سىزىپ، بايقادام اۋىلىنىڭ ۇيالى بايلانىس بار ەكى اۋىلدىڭ ورتاسىندا تۇرعانىن كورسەتكەن. ەدىگە رادولدا حاتىنىڭ تولىق نۇسقاسى تومەندە ۇسىنىلىپ وتىر.

وقۋ جىلى جاقىنداپ قالدى. ءبىرىنشى توقساندى بالالار قاشىقتان وقىتۋعا جۇمسايتىنى بەلگىلى. اۋىلداعى مەكتەپ وقۋشىلارىنىڭ وقۋعا دەگەن تالپىنىسى زور، ءبىراق ءۇي تاپسىرماسىن ورىنداپ مۇعالىمدەرىنە جىبەرۋ ءۇشىن بالالار شاتىرعا كوتەرىلىپ ​​ۇيالى بايلانىسى بار جەردى ىزدەۋگە ءماجبۇر.
⠀
بالالاردى قاشىقتىقتان وقىتۋ ءۇشىن تۇراقتى جانە ساپالى ينتەرنەتپەن قامتاماسىز ەتۋ كەرەك. قاراعاندى قالاسىنان نەبارى 20 شاقىرىم جەردە ورنالاسقان اۋىلدى ۇيالى بايلانىس نەمەسە ينتەرنەتپەن قامتاماسىز ەتە الماي وتىرعان اۋدان مەن وبلىس باسشىلارىنا ۇلكەن سىن بولۋعا ءتيىس.
⠀
قاراعاندى ​​وبلىسىنىڭ ءبىلىم باسقارماسى بۇل ماسەلە ولاردىڭ باقىلاۋىندا ەكەنىنە جانە جاقىن ارادا شەشىلەتىنىن جىلدار بويى ايتىپ كەلەدى، ءبىراق ءالى وزگەرىس جوق.

ينتەرنەتتىڭ جوقتىعى ۋنيۆەرسيتەت/كوللەدجدەردە وقيتىن ستۋدەنتتەرگە دە اۋىر ءتيىپ تۇر. ولاردىڭ كەيبىرى امالسىزدان قالادان پاتەر جالداپ، سول جەردە ينتەرنەتپەن وقۋعا ءماجبۇر. اۋىل تۇرعىندارى امالسىزدان ۇيلەرىنە 20-60 مىڭ تەڭگەگە ۇيالى بايلانىس كۇشەيتكىشىن ساتىپ الىپ، ورناتقان ەدى. ءبىراق ودان كۇتكەندەي ناتيجە بولمادى. ۇيالى بايلانىس پەن ينتەرنەتتىڭ جوقتىعىنان كۇزدە اۋىل مەكتەبى بالالاردى مەكتەپتە وقىتۋدى جوسپارلاپ، ءقازىر مۇعالىمدەر سوعان وراي جۇمىس جاساپ جاتىر ەكەن. قالاعا بارىپ-كەلىپ جۇمىس ىستەيتىن اتا-انالار بار. ولار قالادان ۆيرۋس جۇقتىرىپ الۋ ءقاۋپى بار. كۇزدە ۆيرۋستىڭ ەكىنشى تولقىنى ءورشيتىن شاعىندا مەكتەپكە بارۋ ۆيرۋستىڭ تارالۋىن ءورشىتىپ جىبەرۋى عاجاپ ەمەس.

اۋىلعا مۇنارا قويىپ، وسى ماسەلەنىڭ الدىن الۋعا بولاتىن سياقتى عوي، ءبىراق ولار (جاۋاپتى لاۋازىم يەلەرى – رەد.) باسقاشا ويلاپ، جاعدايدى قيىنداتىپ جىبەرەتىنى وكىنىشتى-اق.

P.S. قاراعاندى وبلىسىنىڭ ءبىلىم بەرۋ باسقارماسى اۋىلداعى ماسەلەدەن حاباردار. ول جەردەگىلەر بايقادام اۋىلىندا جەلىلىك بايلانىستىڭ جوقتىعىن مويىنداپ وتىر. ماسەلەنى شەشۋ ءۇشىن ينتەرنەت جۇرگىزەتىن پروۆايدەرگە ەلدىمەكەندى ينتەرنەتپەن قامتاماسىز ەتۋ تۋرالى تالاپ قويىپ، حات جولدانعان. باسقارماداعىلار ماسەلەنى باقىلاپ وتىراتىندارىنا سەندىرۋدە.