پرەزيدەنت قاسىم-جومارت توقايەۆ مەملەكەتتىك كوميسسياعا ەلدە كارانتين رەجيمىن تاعى ەكى اپتاعا ۇزارتۋدى تاپسىردى. بۇل تۋرالى اقوردانىڭ رەسمي سايتى حابارلادى.

– مەملەكەت باسشىسى شىلدە ايىندا ەنگىزىلگەن شەكتەۋ شارالارىنىڭ وڭ اسەرىن ودان ءارى ارتتىرۋ ماقساتىندا، سونداي-اق قازاقستانداعى جانە شەكارالاس مەملەكەتتەردەگى ەپيدەميولوگيالىق جاعدايدىڭ كۇردەلەنە ءتۇسۋ ىقتيمالدىعىن ەسكەرە وتىرىپ، مەملەكەتتىك كوميسسياعا كارانتين شارالارىن كەزەڭ-كەزەڭىمەن جەڭىلدەتۋ ارقىلى ەكى اپتاعا ۇزارتۋدى تاپسىردى، – دەدى مەملەكەت باسشىسى.

سونىمەن قاتار كەڭەستە پرەمەر-مينيستر اسقار مامين پرەزيدەنتكە 5 شىلدەدەن باستاپ ەلدە قاتاڭ كارانتين شارالارى ەنگىزىلگەننەن كەيىن ىندەت جۇقتىرۋشىلاردىڭ سانى 29 پايىزعا تومەندەگەنىن باياندادى. ءبىر كۇندە ىندەت جۇقتىراتىن ادامداردىڭ سانى 1500-1600 ارالىعىندا تۇراقتاعان.

ستاسيونارلارداعى ەمدەلۋشىلەردىڭ قاتارى 43 پايىزعا، ونىڭ ىشىندە، رەانيماسيالىق پالاتالارداعى ناۋقاستار سانى 27 پايىزعا ازايعان. ساۋىعىپ شىققانداردىڭ سانى 63 پايىزعا دەيىن وسكەن. جەدەل-جاردەم شاقىرۋ جاعدايى تومەندەگەن. وسىلايشا دەنساۋلىق ساقتاۋ جۇيەسىنىڭ نەگىزگى جۇكتەمە كورسەتكىشىن تومەندەتۋگە قول جەتكىزىلگەن.