دۇنيەجۇزىلىك دەنساۋلىق ساقتاۋ ۇيىمى COVID-19 تارالۋىنىڭ ماۋسىمدىق سيپاتى جوق جانە اۋا رايىنىڭ وزگەرۋىمەن دە بايلانىستى ەمەس ەكەنىن ايتتى. ۆيرۋستىڭ تارالۋىن بارلىعىنا بەلگىلى قاراپايىم عانا شارالاردى قولدانىپ قانا توقتاتۋعا بولادى، سونىڭ ءبىرى – الەۋمەتتىك قاشىقتىقتى ساقتاۋ، دەپ حابارلادى بۇۇ جاڭالىقتار ورتالىعى.
– ۆيرۋستىڭ تارالۋىنا جىل مەزگىلى اسەر ەتەتىنىنە سەنۋگە ازىرگە نەگىز جوق. ونىڭ ادامدار كوپ جينالاتىن، فيزيكالىق قاشىقتىق ساقتالمايتىن جەردە تارالاتىنى بەلگىلى، – دەدى دوكتور مارگارەت حارريس.
ددسۇ-عا كەلىپ تۇسكەن مالىمەتتەرگە قاراعاندا، بۇگىندە COVID-19 ۆيرۋسىن جۇقتىرۋدىڭ 16 301 736 وقيعاسى راستالىپ، ودان 650 069 ادام كوز جۇمدى.
پاندەميانىڭ وشاعى – سولتۇستىك جانە وڭتۇستىك امەريكا، وندا 8،7 ملن وقيعا تىركەلدى. ەكىنشى ورىندا ەۋروپا – 3،2 ملن، ودان كەيىن وڭتۇستىك-شىعىس ازيا (1،8 ملن)، شىعىس جەرورتا تەڭىزى ەلدەرى (1،5 ملن)، افريكا – 712 920 جانە باتىس تىنىق مۇحيتى ايماعى 291 993 تۇر.
مارگارەت حارريس جەنيەۆادا وتكەن باسپا ءسوز كونفەرەنسياسى كەزىندە COVID-19 ۆيرۋسى ماۋسىمدىق سيپاتقا يە دەگەن پىكىردى جوققا شىعاردى.
– مىسالى، قازىرگى كەزدە جاز مەزگىلى بولىپ جاتقان اقش-تا ىندەت ءورشىپ تۇر، اۋرۋ جۇقتىرۋدىڭ ەڭ كوپ وقيعاسى سوندا تىركەلگەن، – دەدى حارريس.
ءحارريستىڭ ايتۋىنشا، قىس تۇسكەن وڭتۇستىك جارتى شاردا "قىزىق" جاعداي قالىپتاسقان. وندا ماۋسىمدىق تۇماۋ ەمەس، COVID جۇقتىرۋدىڭ جوعارى كورسەتكىشى تىركەلگەن.
– وڭتۇستىك جارتى شاردا تۇماۋ كەشىرەك باستالادى دەپ ويلايمىز. كليماتى ءبىرقالىپتى ەلدەردە تۇماۋ ۆيرۋسى "ماۋسىمارالىق" جاعدايعا ورالعان، – دەدى حارريس.
ازىرگە ەلدەرگە ءبىر ۋاقىتتا ەكى ۆيرۋس – COVID-19 جانە تۇماۋمەن كۇرەس جۇرگىزۋ كەرەك بولسا، جاعدايدىڭ قالاي قالىپتاساتىنىن بولجاپ ايتۋ قيىن.
– رەسپيراتورلىق اۋرۋ دەڭگەيى جوعارى جەردە ەكىنشىسى تارالا باستاسا، دەنساۋلىق ساقتاۋ جۇيەسىنە ۇلكەن جۇكتەمە تۇسەدى، – دەپ تولىقتىردى مارگارەت حارريس.
COVID-19-عا تەستىلەۋ اقىلى بولۋ كەرەك پە دەگەن سۇراققا ددسۇ وكىلى بۇل شەشىمدى ەلدەردىڭ وزدەرى قابىلداۋى كەرەك ەكەنىن ايتتى.
– ەگەر ءسىز تەست جاساماساڭىز، وندا ءبىز اۋرۋدىڭ قايدا بولعانىن بىلمەيمىز. ءبىز سونداي-اق بارلىق ەلدەردى تەستىلەۋ اۋقىمىن جانە وعان قول جەتىمدىلىكتى كەڭەيتۋگە شاقىرامىز، – دەدى ول.
پىكىر قالدىرۋ