جۇقپالى ىندەتتىڭ جاپپاي تارالۋىنا بايلانىستى ءقازىر ينفەكسيامەن كۇرەسۋگە مەديسينا قىزمەتكەرلەرىمەن بىرگە ەرىكتىلەر دە جاپپاي جۇمىلا باستادى.

اتاپ ايتساق، الماتى وبلىسى اقسۋ اۋدانى ب.سىرتتانوۆ اۋىلىنىڭ جەكە شارۋالارى داستان ءومىرزاق ۇلى، ەربولات تاسبولات، قالقامان سامالبەك، ۇلان مۇقاتايەۆ جانە اۋىل كاسىپكەرلەرى اۋىلدىق وكرۋگكە قاراستى ب.سىرتانوۆ اۋىلى مەن قوپا اۋىلىنداعى 40 وتباسىعا 50 ليتر قىمىز بەردى. سونىمەن قاتار، اقسۋ اۋداندىق ورتالىق اۋرۋحاناسىندا جاتقان ناۋقاستارعا 1 قويدىڭ ەتى مەن 50 ليتر قىمىز تاراتتى.

اۋداندىق ورتالىق اۋرۋحانانىڭ پروۆيزورلىق جانە جۇقپالى اۋرۋلار بولىمىندە قىزمەت ەتەتىن 64 مەديسينا قىزمەتكەرلەرى ەكى ايدان بەرى ە.سيحىموۆ اتىنداعى مەكتەپ-ينتەرناتىنىڭ جاتاحاناسىنا ورنالاسقان بولاتىن. باستى ماقسات تۇرعىنداردىڭ جانە اق حالاتتى ابزال جانداردىڭ وتباسىلارىن، جاقىندارىن ساقتاۋ. ولارعا قولايلى جاعداي جاساۋ. وسىعان وراي، قىزىلاعاش، اقسۋ، ويتوعان، قاراگوز، جاڭالىق، قاراشىلىك، ن. ەسەبولاتوۆ، ءى. جانسۇگىروۆ اۋىلدارىنداعى ازاماتتاردىڭ ۇيىمداسۋىمەن 600 مىڭ تەڭگە قاراجات جيناپ، ىندەتپەن كۇرەسىپ جۇرگەن اح حالاتتى ابزال جاندارعا ازىق-تۇلىك، جەمىس-جيدەك، قوي ەتى مەن قىمىز اپارىپ بەردى. كەڭ جۇرەكتى اۋىل ازاماتتارىنىڭ ءقاۋىپتى ىندەت كەزىندە اۋدان جۇرتى ءۇشىن اتقارعان يگىلىكتى ىستەرى كوز قۋانتادى. ءاردايىم قايىرىمدىلىق جاساپ، قولىنداعىسىن ءبولىپ بەرۋگە دايىن تۇراتىن جومارت جاندار اۋداندا از ەمەس. جومارت جاندار يگىلىكتى شارا ءالى دە جالعاسىن تاباتىندىعىن جەتكىزدى.

ايدار قالييەۆ

الماتى وبلىسى