ەلىمىزدە كوروناۆيرۋس ىندەتى ءورشىپ تۇر. دەسە دە، كەسەلمەن حالقىمىز جۇمىلا كۇرەسىپ، ءار ءوڭىردىڭ قايىرىمدى جاندارى قولدان كەلگەن كومەگىن اياماۋدا. وعان دالەل قازاقستاندىق ۇزدىكسىز ءبىلىم بەرۋ قاۋىمداستىعىنىڭ ەرىكتىلەرى الماتى وبلىستىق اۋرۋحاناعا وتتەگى كونسەنتراتىن تارتۋ ەتۋى.

قىرىقتان استام جەكەمەنشىك بالاباقشا مەكەمەسىنەن قۇرالعان قاۋىمداستىق قىزمەتكەرلەرى تىنىس الۋ اپپاراتىمەن قاتار باسىن قاتەرگە تىگىپ، كۇنى-تۇنى جۇمىس ىستەپ جۇرگەن دارىگەرلەرگە العىسىن ءبىلدىرىپ، سۋ، شوكولاد اكەلدى.

وسى شاراشا وراي ۇيىمداستىرىلعان جيىن بارىسىندا «ارلەن» بالاباقشاسىنىڭ مەڭگەرۋشىسى مادينا مامەتوۆا جاساندى تىنىس الۋ اپپاراتى الماتىدان 600 مىڭعا ىنعانى اتاپ ءوتتى.

– ءبىزدىڭ ماقسات – ءبىر ادامعا بولسا دا كومەكتەسۋ. مامانداردىڭ ايتۋىنشا ءبىر اپپاراتپەن كۇنىنە ءۇش ادام ەم الادى. جۇمىلا كوتەرگەن جۇك جەڭىل. بارلىق قالتالى جاندار قولىنان كەلگەنشە كومەكتەسسە، بۇل ىندەتتى دە ەڭسەرەمىز. الەمدى جايلاعان ىندەت وڭىرىمىزدە ودان ءارى ورشىمەۋ ءۇشىن مەديسينا قىزمەتكەرلەرى قيىن جاعدايدا جۇمىس ىستەۋدە. ءتىپتى، وزدەرى دە اۋىرىپ جاتىر. سول سەبەپتى قالعان قاراجاتقا دارىگەرلەرگە قوي ەتى مەن قىمىز الىپ، ىستىق سورپا بەرسەك دەگەن جوسپارىمىز بار، – دەدى ول.

جيىن بارىسىندا وبلىستىق اۋرۋحانانىڭ ديرەكتورى مۇرات راحمەتوۆ قۇرال-جابدىقتاردى اۋرۋحاناعا جەتكىزىپ بەرگەن ەرىكتىلەرگە  العىسىن ءبىلدىردى.

– ءقازىر وبلىستاعى اۋرۋحانادا 200 ادام ەمدەلۋدە. سوندىقتان اپپارات اۋاداي قاجەت. جاناشىر جاندار ناۋقاستارعا ۇلكەن كومەك كورسەتىپ جاتىر. بۇل اپپاراتتار مۇنداعى ناۋقاستارعا ۇلكەن كومەك بولدى. سول ءۇشىن وسىنداي يگى ءىس جاساعان ازاماتتارعا العىسىمىزدى ايتامىز، – دەدى مۇرات كومەك ۇلى.

ايدار قالييەۆ

الماتى وبلىسى